Талабга жавоб бермайдиган маҳсулотни ўз ихтиёри билан чақириб олган тадбиркорларга енгиллик берилади

Қонунчилик палатасидаги ЎзЛиДеП фракцияси йиғилишида тўлов тизими операторлари ва тўлов ташкилотлари фаолиятини такомиллаштириш, мувофиқликни баҳолаш органлари масъулиятини ошириш ҳамда тадбиркорларга енгиллик беришга доир ва бошқа қатор қонун лойиҳалари атрофлича кўриб чиқилди.

Фото: Олий Мажлис Қонунчилик палатаси

Йиғилишда кўриб чиқилган ҳужжат — мувофиқликни баҳолаш органларининг масъулиятини янада ошириш ҳамда маҳсулотларни ўз ихтиёри билан чақириб олган тадбиркорларга енгиллик беришга қаратилган қонун лойиҳаси бўлди.

У билан Фуқаролик кодексига, “Истеъмолчиларнинг ҳуқуқларини ҳимоя қилиш тўғрисида”ги, “Стандартлаштириш тўғрисида”ги ва “Техник жиҳатдан тартибга солиш тўғрисида”ги қонунларга тегишинча мувофиқликни баҳолаш органларининг масъулиятини оширишга ҳамда техник регламентлар талабларига жавоб бермайдиган маҳсулотни чақириб олган тадбиркорлик субъектларини рағбатлантиришга қаратилган қўшимча ва ўзгартиришлар киритилмоқда.

Қонун лойиҳасининг муҳокамасида фракция аъзоси Муҳсинжон Холмуҳамедов ўз нуқтайи назарини билдириб, мазкур ҳужжат истеъмолчиларнинг ҳуқуқларини ҳимоя қилиш, уларнинг ҳаёти ва соғлиғини муҳофаза қилиш, сифатсиз маҳсулотларни бозордан чиқариш жараёнида тадбиркорлар иштирокини рағбатлантириш орқали самарали ҳуқуқий механизмларни шакллантиришга хизмат қилишини таъкидлади.

Йиғилишда кун тартибидан ўрин олган бошқа масалалар ҳам кўриб чиқилиб, тегишли қарорлар қабул қилинди.

#қонун лойиҳаси #тадбиркорлик #ЎзЛиДеП