АҚШ стартапи бўлажак фарзанднинг кўз ранги, бўйи ва ақл даражасини танлашни таклиф қилди

Американинг Nucleus стартапи Embryo деб номланган хизматни ишга туширди: у ЭКО жараёнидан ўтаётган ота-оналарга керакли генетик хусусиятларга эга эмбрионни танлаш имконини беради. Буларга нафақат саломатлик, балки ташқи кўриниш, бўйи, ақл ва ҳатто шахсий айрим хусусиятларига мойиллик ҳам киради.

Технология генларни таҳрирлашни ўз ичига олмайди. Бунинг ўрнига, тизим аллақачон мавжуд эмбрионларнинг ДНКсини таҳлил қилади ва ота-оналарга энг мосини танлашни таклиф қилади. Платформанинг интерфейси келажакдаги болалар учун вариантларни 1 мингдан ортиқ параметрлар, жумладан, ирсий касалликлар, онкология, диабет, руҳий касалликлар ва ҳатто кал бўлиш эҳтимоли бўйича солиштириш имконини беради. Кўз ва соч ранги каби ташқи хусусиятлар, шунингдек, ақлий қобилиятлар билан боғлиқ кўрсаткичлар ҳам баҳоланади.

Хизмат нархи 6 минг доллар. Бироқ, компания 100 фоиз натижага кафолат бермаслигини таъкидлайди – Nucleus фақат болада керакли хусусиятларнинг пайдо бўлиш эҳтимолини оширади. Одатда, бир циклда кўчириш учун мос бўлган уч-олтита эмбрионни олиш мумкин ва улар орасида танлов амалга оширилади.

Хизмат аллақачон жамиятда баҳс-мунозараларга сабаб бўлган. Баъзи экспертлар ахлоқий хавф-хатарларга ишора қилади, бошқалари эса онгли танлов ҳаётни сақлаб қолиш ва келажак авлодлар саломатлигини яхшилашига ишонишади.

Ҳар қандай ҳолатда, Nucleus генларни таҳрирлашни таклиф қилмайди, фақат танлашни таклиф қилади - бу эса жараённи АҚШ амалий қонунчилиги доирасида имкон қадар хавфсиз ва ахлоқий жиҳатдан мақбул қилади.