Оқ уй: Трамп Путин ва Зеленский билан саммитга тайёр

АҚШ президенти Доналд Трамп Туркиядаги тўғридан тўғри музокараларнинг учинчи раунди доирасида Россия президенти Владимир Путин ва Украина етакчиси Володимир Зеленский билан учрашишга тайёр. Бу ҳақда 2 июн, душанба куни Вашингтонда Оқ уй матбуот котиби Кэролайн Ливитт маълум қилди.

Трамп «агар гап бу нарса (саммит) ҳақида кетса, бунга очиқ, бироқ (биринчи навбатда) у бу икки етакчи ва ҳар икки томоннинг музокаралар столига ўтиришини истайди», — деб таъкидлади Ливитт.

Аввалроқ Туркия президенти Ражаб Тоййиб Эрдўған Путин, Зеленский ва Трампга июн ойи охирида Истанбул ёки Анқарада учрашишини таклиф қилган эди, деб хабар берди AFP.

Туркия вазирлар маҳкамаси йиғилишидан сўнг сўзлаган Эрдўған бундай учрашув унинг «энг катта орзуси» бўлишини айтди. «Ҳатто Трампни таклиф қилмоқчиман», — дея Туркия раҳбарининг сўзларини келтиради Anadolu.

Туркия етакчисининг қўшимча қилишича, агар етакчилар Туркияда йиғилса, у «улар билан ҳам шу форматда учрашади», «Истанбулни дунёнинг марказига айлантира оламиз».