Ўзбекистонда ташлаб юборилаётган биомассадан фойдаланиш пилот лойиҳаси амалга оширилади

Вазирлар Маҳкамаси ҳузуридаги «Ўзэнергоинспекция» бошлиғи Илҳом Ниғматуллаев ва Корея Энергетика агентлиги ижрочи директори Ким Сунг Ван бошчилигидаги делегация ўртасида ҳамкорлик учрашуви бўлиб ўтди.

Фото: Ўзэнергоинспекция

Учрашувда Hyundai Power Systems, Quantum Solution, Aquapro ҳамда KEC System компаниялари вакиллари ҳам иштирок этди.

Учрашув давомида Ўзбекистонда ташлаб юборилаётган биомассадан фойдаланиш орқали когенерация лойиҳаларини ривожлантириш имкониятлари, технологик ҳамкорлик истиқболлари ҳамда Тошкент шаҳрида ўтказилган Energy Value Networks Forum натижалари муҳокама қилинди.

Биомасса асосидаги пилот лойиҳа Фарғона вилоятининг Қўқон шаҳри яқинидаги ҳудудда амалга оширилиши режалаштирилган бўлиб, уни 2030 йилга қадар якунлаш мўлжалланмоқда.

Шунингдек, Корея Энергетика агентлиги томонидан жорий йилда ташкил этиладиган малака ошириш курсларида «Ўзэнергоинспекция» ходимларининг иштирокини фаоллаштириш бўйича чора-тадбирлар ишлаб чиқилди.

Учрашув давомида икки томонлама ҳамкорликни мустаҳкамлаш мақсадида ўзаро англашув тўғрисидаги меморандум имзоланиши бўйича таклифлар ҳам муҳокама қилинди.

#Ўзэнергоинспекция