Зеленский Украинада тинчлик «эртагаёқ» бошланиши мумкинлигини айтди

Украинада тинчлик эртагаёқ бошланиши мумкин, деди Украина президенти Владимир Зеленский RTL немис каналига берган интервьюсида. Унинг сўзларига кўра, бу жараён «аста-секин барқарор тинчликка олиб келадиган» сулҳдан бошланиши керак.

«Бу тинчлик эртагаёқ бошланиши мумкин», деб таъкидлади Украина раҳбари ва Киев тинчликни хоҳлашини, лекин қуролга муҳтожлигини қўшимча қилди. Зеленский, шунингдек, Москванинг тинчликка тайёрлигини кўрмаётганини айтди ва шу муносабат билан Россияга халқаро босимни кучайтиришга чақирди.

Бир кун аввал, 28 май куни журналистлар билан суҳбатда Украина президенти разведка маълумотлари ва Россия санкциялар таъсирини қандай ҳис қилаётгани ҳақидаги «кўплаб давлатлар» таҳлилига таяниб, можаро 2026 йил июнида якунланишига умид билдирган эди.

Унинг сўзларига кўра, можарога барҳам бериш муддати Европа Иттифоқининг 18-санкция пакети ва Россияга қарши «АҚШ томонидан киритилган кучли санкциялар пакети» билан қисқариши мумкин. Зеленский Украина 2026 йилгача жанг қилишни истамаслигини айтди.

Суҳбат чоғида Украина раҳбари Берлиндан бир неча бор сўраган Германиянинг узоқ масофали Taurus ракеталарини ҳам тилга олди. Зеленский сўзларига кўра, у Германия канцлери Фридрих Мерц билан Киевга ушбу ракеталарни етказиб бериш масаласини очиқ муҳокама қилмасликка келишиб олган.

«Биз бу йўналишда ишлаяпмиз, аммо ҳозир қўшимча маълумот бера олмайман. Мен канцлерга ваъда берганман ва бунга содиқ қоламан», деди Зеленский.

Мерц, шунингдек, бир кун олдин Германия Украинага узоқ масофага учувчи қуролларни етказиб беришга ва биргаликда ишлаб чиқаришни бошлашга тайёрлигини айтган. Унинг сўзларига кўра, Буюк Британия, Франция, АҚШ ва Германия бир неча ой аввал Украинага етказиб бериладиган қурол-яроғ турлари бўйича чекловларни бекор қилган.