АҚШ Украинадан тинчлик келишуви бўйича шартлар рўйхатини олди

Вашингтон Россия ва Украина ўртасидаги музокараларнинг янги раунди Швейцарияда ўтказилиши мумкинлигини маълум қилди.

Фото: Getty images

АҚШ Украинадан ўт очишни тўхтатиш бўйича ўз шартлари батафсил келтирилган ҳужжатни қабул қилиб олди. Бу ҳақда Трампнинг махсус вакили Кит Келлог Fox News эфирида маълум қилди.

Келлог Украина тақдим этган рўйхатдан айнан қандай бандлар мавжудлигига ойдинлик киритмаган.

АҚШ президентининг махсус вакили сўзларига кўра, яқин кунларда Вашингтон Россиядан ҳам шундай рўйхат олишни кутмоқда.

Кит Келлогнинг айтишича, Россия ва Украина ўртасидаги музокараларнинг янги раунди Женевада ўтказилиши мумкин. Олдинроқ РФ ташқи ишлар вазири Сергей Лавров Москва учун Туркия варианти афзалроқ эканини маълум қилганди.

Россия ва Украина Истанбулдаги музокараларда ўт очишни тўхтатиш бўйича ҳар икки томоннинг талаблари келтирилган ҳужжатни алмашишга келишиб олганди. Музокаралар шундан кейин давом этади.

Лавров ҳам Россия томони рўйхат устидаги ишларни якунлаётгани ва маҳбуслар алмашинувидан сўнг уни Украинага тақдим этишга тайёр бўлишини айтган эди. Маҳбуслар алмашинуви эса 25 май куни якунланди.

Россия яна бир ҳужжат — «бўлажак тинчлик шартномаси тўғрисидаги меморандум»ни ҳам тайёрламоқда. У тинчлик шартлари бўйича рўйхатдан нимаси билан фарқ қилиши ҳозирча маълум эмас. Кремлнинг қайд этишича, шартлар рўйхати ва меморандум — икки хил ҳужжат.

#АҚШ #Украина #Россия