Франция Павел Дуровнинг АҚШга боришига рухсат бермади

Франция ҳукумати Telegram асосчиси Павел Дуровнинг «инвестиция фондлари билан музокаралар ўтказиш учун» Қўшма Штатларга боришига рухсат бермади. Бу ҳақда Париж прокуратураси баёнотига таяниб, Politico хабар берди.

Идоранинг қайд этишича, қарор 12 май куни «бундай сафар учун зарур ва муҳим асос йўқлиги боис» қабул қилинган.

18 май куни Дуров Парижда ўзи яшаётган Hotel de Crillon’га Франция Ташқи разведка хизмати (DGSE) раҳбари Николя Лернер келганини айтганди. Дуровнинг сўзларига кўра, амалдор ундан Руминияда ўтказилаётган сайловлар олдидан Telegramʼда «консервативлар овозини ўчиришни» сўраган. Дуровнинг таъкидлашича, у Лернернинг илтимосига рад жавобини берган. Франция ҳукумати айбловни бутунлай рад этмоқда.

DGSE вакилларининг маълум қилишича, уларнинг вакиллари ростдан ҳам бир неча бор Дуров билан учрашган, аммо бу алоқалардан мақсад фақат унинг мессенжер асосчиси сифатида террорчилик контенти ва болалар порнографияси тарқалишининг олдини олиш масъулиятини эслатиш бўлган. Разведка хизматининг расмий изоҳида келтирилишича, DGSE учрашувлар вақтида сайлов жараёнига аралашиш бўйича бирор талаб тилга олинганини кескин рад этади.

Ҳозирда Павел Дуров Францияда суд назорати остида. Унинг мамлакатдан ташқарига чиқиши чекланган: у ҳукуматнинг расмий рухсатисиз Франция ҳудудини тарк эта олмайди. 2025 йил баҳорда Франция ҳукумати Дуровнинг Дубайга бориб-келишига вақтинча рухсат берган эди.

Павел Дуров 2024 йил августда Парижда ушланган эди. Telegram асосчиси мессенжер террорчилик пропагандаси ва болалар порнографиясига оид материаллар тарқалишига қарши керакли чораларни кўрмаганликда айбланмоқда. Ҳуқуқ-тартибот органларининг таъкидлашича, платформа маъмурияти тизимли равишда тақиқланган контентни блоклаш талабларини эътиборсиз қолдириб келган.