Писториус: Путин Украинадаги уруш тугашини хоҳламайди

Германия мудофаа вазири Борис Писториус Россия президенти Владимир Путинни Украина инқирозини ҳал қилиш бўйича Туркиядаги музокаралардан сўнг Украинадаги урушни тугатишдан манфаатдор эмасликда айблади. Путин аввалига ўт очишни тўхтатиш бўйича музокаралар ўтказиш ниятини билдирди, бироқ кейин келмай, ўз ўрнига учинчи даражали делегацияни юборди, деди вазир 16 май, жума куни Римда Италия, Франция, Буюк Британия ва Полшадан келган ҳамкасблари билан учрашувдан сўнг.

Писториуснинг қайд этишича, Путин Украина президенти Володимир Зеленский билан музокара қилишдан бош тортмоқда. Шу тариқа, унинг сўзларига кўра, Путин ҳозирда бу тажовузкор урушни тугатишдан «мутлақо манфаатдор эмаслигини» очиқ кўрсатмоқда. «Тинч йўл билан ечим топишга жиддий интилиш»дан дарак йўқ, деди Писториус.

Шу фонда Германия мудофаа вазири яна бир бор таъкидлади: «Европа ва унинг иттифоқчилари Украинани ишончли ва изчил қўллаб-қувватлашда давом этмоқдалар». У «Украинага кенг кўламли ёрдам кўрсатишни» давом эттиришга ваъда берди.

Писториуснинг қўшимча қилишича, у Италия, Франция, Буюк Британия ва Полшадаги ҳамкасблари билан Киевга қўшимча ҳарбий ёрдам кўрсатишдан ташқари, Украинада юзага келиши мумкин бўлган ўт очишни тўхтатиш бўйича «мониторинг»ни ҳам муҳокама қилган. Муҳокама, хусусан, «ким ва қандай форматда масъулиятни ўз зиммасига олиши мумкинлиги» ҳақида бўлди, деди у.