Ўзбекистонда “Ҳарвардчилар мактаби” очилади

Билимли ёшларни тизимли йўналтириб, жаҳондаги топ-10 университетларга киришини таъминлаш мақсадида “Президент иқтидорли фарзандлари” миллий дастури бошланади. Дастур доирасида Ал-Беруний номидаги халқаро мактаб (“Ҳарвардчилар мактаби”) ташкил этилади. Бу йил 8-синф битирувчиларидан 60 нафари саралаб олиниб, улар топ-10 олийгоҳларга мақсадли тайёрланади.

Ҳарвард университети / Фото: Michael Fein | Bloomberg | Getty Images

Хорижда ўқиётган ўзбекистонлик ёшларнинг атиги 1 фоизи топ-100даги олийгоҳларга кирган. Ваҳоланки, топ-10 билан топ-200даги таълим нархи бир-биридан атиги 15-20 фоизга фарқ қилади. Бу ҳақда президент селекторида сўз борди.

“Ёшларимиз жуда иқтидорли. Уларни тизимли йўналтириб, олийгоҳ танлашга кўмаклашиб, мақсадли тайёрлашни йўлга қўйсак бўлди, кўрсаткичларимиз каррасига ошади”, – деди Шавкат Мирзиёев.

Давлат раҳбари “Президент иқтидорли фарзандлари” миллий дастурини бошлаш ва “Ҳарвардчилар мактаби”ни очиш бўйича катта фармон имзолаганини айтди.

Бу муассаса Ал-Беруний номидаги халқаро мактаб сифатида ташкил этилади. Бу йил 8-синф битирувчиларидан 60 нафари саралаб олиниб, халқаро мактабда топ-10 олийгоҳларга мақсадли тайёрланади.

Бундан ташқари, Президент ва ихтисослашган мактаблардан 208 нафар маслаҳатчи умумтаълим мактабларига бириктирилади.

Миллий дастур асосида маслаҳатчилар мактаблардан ҳар йили энг салоҳиятли 3 минг ўқувчини танлаб олиб, АҚШнинг Ҳарвард, Йел, Колумбия, Корнел каби олийгоҳларига тайёрлайди.

#ёшлар #Шавкат Мирзиёев #Эл-юрт умиди #мактаб #Ҳарвардчилар мактаби