Зеленский: Украина музокараларнинг ҳар қандай форматига тайёр

Украина президенти Володимир Зеленский 15 май куни Туркияда ўтказиладиган учрашувда Россия томонидан ким қатнашиши тўғрисида маълумотни кутмоқда. Унинг сўзларига кўра, Украина музокараларнинг ҳар қандай форматига тайёр.

Россия томонидан сўнгги бир кун ичидаги ўққа тутишлар ҳақида гапирар экан, Зеленский эҳтимолий музокараларни ёдга олди. «Бутун дунё тўғридан-тўғри музокаралар таклифи учун Путиндан оддий «ҳа» жавобини кутаётган вақтда — у Украинага зарбалар беришни давом этяпти. Бунда ҳеч қанақа ҳарбий маъно йўқ», — дейди Украина президенти Путинни урушни чўзишда айблаб.

«Мен Россиядан ким келишини кутяпман ва шунда Украина қандай қадамлар ташлаши кераклигини белгилайман. Уларнинг медиасидаги сигналлар ҳозирча ишончсиз», — дея қўшимча қилади Зеленский. У АҚШ президенти Доналд Трамп ҳам Туркиядаги музокараларда иштирок этиши мумкинлигини эслатиб ўтди.

Зеленскийнинг сўзларига кўра, Украина ўз навбатида, музокараларнинг ҳар қандай форматига тайёр. «Украина музокараларнинг ҳар қандай форматига тайёр ва биз учрашувдан қўрқмаймиз. Эртага — Туркияда», — дейди у.

15 май, пайшанба куни Истанбулда Россия-Украина музокаралари бошланиши мумкин. Туркия ТИВ раҳбари Ҳоқон Фидан 14 май куни унинг формати «ҳали узил-кесил белгилаб олинмагани»ни айтди. Бу Москва ва Киев ўртасида 2022 йил баҳоридан буён илк музокаралар бўлиши керак, ўшанда томонлар урушнинг дастлабки ҳафталарида ўт очишни тўхтатиш бўйича келишишга уринганди.