Хоразмдаги уйлардан бирига астероид тушгани рад қилинди

Боғот туманидаги уйлардан бирининг даҳлизи қулаб тушган. ИИБ ҳамда ФВБнинг махсус лаборатория хизматлари томонидан ўрганиш ишлари олиб борилганида ҳодиса жойида ҳеч қандай фазо жисмлари аниқланмаган.

Фото: Видеодан кадр

Ижтимоий тармоқларда Боғот туманидаги уйлардан бирига астероид тушгани ҳақида хабарлар тарқалди. Хоразм вилояти Фавқулодда вазиятлар бошқармаси ҳолат юзасидан расмий баёнот берди.

Маълум қилинишича, 12 май куни соат 3:39 да Хоразм вилояти ФВБга Боғот тумани Юксалиш маҳалласидаги уй даҳлизининг тахминан 10 кв м том қисми қулагани тўғрисида хабар келиб тушган.

«Мазкур ҳолат юзасидан ижтимоий тармоқларда турли асоссиз ва ҳақиқатга тўғри келмайдиган маълумотлар, хусусан, ҳодиса жойига астероид тушгани ҳақида нотўғри хабарлар тарқалмоқда», дейилади бошқарма баёнотида.

Қўшимча қилинишича, ҳодиса содир бўлган манзилда ИИБ ҳамда ФВБнинг махсус лаборатория хизматлари томонидан ўрганиш ишлари олиб борилган. Ўрганишлар давомида ҳодиса жойида ҳеч қандай фазо жисмлари ёки портлаш хусусиятига эга мосламаларнинг қолдиқлари аниқланмаган.

Шунингдек, ўрганишларда хонадонда 2 та пропан газ баллони борлиги маълум бўлган.

Қайд этилишича, ҳозирда ҳодиса юзасидан терговга қадар суриштирув ишлари олиб борилмоқда. Ҳодисанинг келиб чиқиш сабабини аниқлаш мақсадида махсус экспертиза тайинланган. Экспертиза хулосасига асосан қўшимча маълумотлар берилиши билдирилди.

#астероид #Боғот тумани