Apple деярли бутунлай шиша iPhone чиқаради

Компания шунингдек, биринчи букланадиган iPhone ва бошқа бир қатор инновацион маҳсулотларни тақдим этиши мумкин.

Фото: AP

Apple 2027 йилда, биринчи iPhone чиқишининг 20 йиллиги муносабати билан ўз қурилмаларини катта янгилашга тайёрланмоқда. Бу ҳақда инсайдер Марк Гурман хабар берди. Ана шундай қурилмалардан бири «букилган корпусли, деярли бутунлай шиша iPhone» бўлади.

Қурилма ҳақиқий рамкасиз гаджетга айланади. Бу, эҳтимол, Apple компаниясининг 2019 йилги патентларига асосланган дизайн бўлиб, унда телефон атрофида «узлуксиз ҳалқа ҳосил қилувчи» ягона шишадан ясалган корпус тасвирланган.

Илгари Apple 2027 йилда экран остидаги камерали iPhone чиқаришни режалаштираётгани ҳақида The Information хабар берган эди. Бундан ташқари, The Elec хабарига кўра, Apple рамкасиз дисплей устида ишламоқда, бироқ Samsung ёки Vivo компанияларининг эгри-қиррали технологиясидан воз кечмоқда.

Юбилей смартфонидан ташқари Apple бошқа қурилмаларни ҳам тақдим қилиши мумкин: биринчи буклама iPhone модели, камералар, микрофонлар ва динамиклар билан жиҳозланган ақлли кўзойнаклар, шунингдек, AirPods қулоқчинлари ва камерали Apple Watch – у фақат тиббий мақсадларда ва визуал СИ имкониятларини кенгайтириш учун мўлжалланади.

Энг улуғвор лойиҳалардан бири қўл ва СИ ёрдамчисига эга иш столи роботи бўлиши мумкин. 2027 йилга бориб Apple шунингдек, катта тил моделига асосланган такомиллаштирилган Siri овозли ёрдамчисини тақдим этишни ва сунъий интеллект учун ўзининг сервер чипларини яратишни режа қилмоқда.

Агар компаниянинг режалари амалга ошса, 2027 йил шунчаки юбилей эмас, балки Apple экотизимининг ривожланишидаги ҳақиқий босқич бўлиши мумкин.

#смартфон #iPhone #Apple