Ким Чен Ин Россияни Ғарб тажовузидан ҳимоя қилишга ваъда берди

КХДР етакчисининг сўзларига кўра, бу мамлакат учун «муқаддас миссия»дир.

Фото: KCNA

Шимолий Корея етакчиси Ким Чен Ин Россияга нисбатан тажовузкор бўлса, Ғарб давлатлари билан уруш бошлаши мумкинлигини айтди. Бу ҳақда Корея марказий ахборот агентлиги (KCNA) хабар берди.

Унга кўра, агар Ғарб Россияга «ҳужум» қилса, ўз армиясига русларга ҳужумни қайтаришда ёрдам беришни буюради.

«Агар Қўшма Штатлар ва унинг ғарбий малайлари бўлмиш ядро давлатлари қардош мамлакатимиз Россия Федерациясига ҳарбий бостириб кириш ҳақидаги хавфли ғоясидан воз кечмаса ва ҳужумга ўтса, мен мамнуният билан ва ҳеч иккиланмасдан душманнинг босқинини қайтариш учун ҳарбий куч ишлатишни буюраман», деди у.

Ким Чен Ин, шунингдек, бу шимолий кореяликлар учун «биродарлар ва ўртоқлар сифатида» бажариши лозим бўлган «муқаддас миссия» деб атади.

Аввалроқ Ким Чен Ин ўз жангчиларининг Россия-Украина урушидаги иштироки ўзини оқлашини маълум қилганди. Унинг сўзларига кўра, агар Қўшма Штатлар Россияга қарши ҳарбий провокацияларни давом эттирса, Шимолий Корея ҳарбий куч ишлатишдан тортинмайди.

#Россия #КХДР #Ким Чен Ин