Ватиканда кардиналлар янги Рим папасини сайлади

Сикстин капелласи томига ўрнатилган махсус мўридан янги папа сайланганини англатувчи оқ тутун чиқа бошлади.

Рим-католик черковига раҳбар сайлаш учун Ватиканда конклавга тўпланган кардиналлар янги Рим папаси ким бўлишига келишиб олди. Сикстин капелласи томидаги махсус мўридан чиқаётган оқ тутун бундан далолат беради.

Янги понтифик этиб ким сайлангани ҳозирча номаълум. Номзод учун конклавда иштирок этаётган 133 нафар кардиналнинг учдан икки қисми овоз бериши керак эди.

Яқин орада янги папа Авлиё Пётр соборидаги марказий ойнадан кўриниш бериши кутилмоқда.

Кардиналлар 7 май куни конклав ўтказиладиган Сикстин капелласига тўпланган эди. Бироқ биринчи овоз бериш жараёнида Рим папаси сайланмади.

Сайловлар давомида бир нечта овоз бериш жараёни ўтказилади ва уларнинг ҳар биридан кейин бюллетенлар ёқилади. Сикстин капелласи мўрисидан эса янги папа сайланганига ишора қилувчи тутун чиқади. Агар тутун қора бўлса, бир нафар номзод кераклича овоз тўплай олмаганини (жами овозларнинг учдан икки қисми ва яна бир овоз — яъни 89 овоз), оқ бўлса — сайлов амалга ошганини англатади.

#Рим папаси #конклав