Россия Берлиндаги Карнеги маркази директорини қидирувга берди

Россия Ички ишлар вазирлигининг карточкасида Александр Габуев жиноий иш бўйича қидирувда эканлиги кўрсатилган. «Чет эл агенти» деб эълон қилинган эксперт Жиноят кодексининг икки моддаси бўйича айбланаётгани аввалроқ хабар қилинган эди.

Фото: kp.ru

Россия Ички ишлар вазирлиги Берлиндаги Россия ва Евросиё тадқиқотлари Карнеги маркази директори Александр Габуевни қидирувга берди. Тегишли карточка 7 май, чоршанба куни "Медиазона" томонидан идора маълумотлар базасида аниқланди.

Унда экспертнинг шахсий маълумотлари мавжуд ва у «Жиноят кодексига кўра қидирувда» экани айтилади. Гап қайси моддалар ҳақида кетаётгани айтилмаган.

Айни пайтда, РИА "Новости" аввалроқ Габуевга қарши икки модда бўйича жиноий иш қўзғатилгани ҳақида ёзган эди – «номақбул ташкилот» фаолияти ва «чет эл агенти» вазифаларини бажаришдан бўйин товлаш.

2024 йил май ойида Россия расмийлари Хитой ва унинг Россия Федерацияси билан муносабатлари бўйича эксперт Александр Габуевни «чет эл агентлари» рўйхатига киритди ва ўша йилнинг ёзида Карнеги жамғармаси Россияда «номақбул» ташкилот деб эълон қилинди.

Аввалроқ Берлин Карнеги марказида Россия ва Евросиё бўйича сиёсатшунослик ва гуманитар тадқиқотлар билан шуғулланувчи сиёсатшунос Екатерина Шулман ҳам қидирувга берилган эди. Унга нисбатан Россияда «номақбул» деб тан олинган ташкилотлар фаолиятида қатнашгани учун иш қўзғатилди.

#Россия #Берлин #Александр Габуев