Навоийда савдо мажмуасида ёнғин чиқди

Ўт ўчирувчилар ёнғинни 1 соатдан кўпроқ вақтда ўчиришган. Ҳодиса оқибатида савдо мажмуасининг 200 метр кв майдони ички қисми ҳамда маҳсулотлар ёнган.

Фото: Видеодан кадр

Кармана туманида жойлашган “Тошкент парфум фоод” савдо мажмуасида ёнғин содир бўлди. Навоий вилояти ҳокимлиги ахборот хизмати ҳодиса юзасидан расмий баёнот берди.

Маълум қилинишича, бугун, 6 май куни соат 5:15 да 112 қисқа рақами орқали Кармана тумани ФВБ диспетчерлик хизматига туманнинг Арғун маҳалласида жойлашган савдо мажмуасида ёнғин бўлаётгани ҳақида хабар келиб тушган. 7-қисм ёнғин ўчириш автоэкипажи воқеа жойига соат 5:18 да етиб борган ҳамда ёнғин соат 6:24 да тўлиқ бартараф этилган.

Ҳодиса оқибатида жабрланган ва ҳалок бўлганлар йўқлиги билдирилди. Ёнғинда савдо мажмуанинг 200 кв м майдони ички қисми ҳамда маҳсулотлари ёнган.

Ёнғиннинг келиб чиқиш сабаби ўрганилмоқда.

#ёнғин #Кармана тумани