«Ҳеч қачон ҳеч қачон деманг» — Трамп Канаданинг АҚШга қўшилиши ҳақида

АҚШ президенти Доналд Трамп Оқ уйда Канада бош вазири Марк Карни билан учрашди. Америка президенти яна бир бор Канада АҚШнинг 51-штатига айланиши мумкинлиги ва воқеаларнинг бундай ривожи «кўплаб афзалликлар»ни тақдим этишини таъкидлади.

«Кўчмас мулк соҳасидан биласизки, шундай жойлар бўлади, ҳеч қачон сотилмайди», — дейди Марк Карни Трампнинг бу мавзудаги баёнотига жавобан.

Америка президенти эса «ҳеч қачон ҳеч қачон демаслик кераклигини» қайд этган. Шу билан бирга, у Канада бош вазири билан ушбу масалани муҳокама қилиш ниятида эмаслигини билдирган.

Доналд Трамп бир неча бор Канадага АҚШга қўшилишни таклиф қилган. Оттаванинг Вашингтон билан муносабатларига масъул Канада молия вазири Доминик Леблан Америка етакчиси «бу ҳеч қачон содир бўлмаслигини билсада, шу орқали одамлар орасида саросима пайдо қилмоқчи» эканини айтганди.

Америка раҳбари март ойида яна бир бор Канада «АҚШнинг 51-штатига айланиши керак» деган даъволарини такрорлаган ва мамлакатни савдо ҳамкори сифатида ҳам танқид қилганди. Трамп Канаданинг собиқ бош вазири Жастин Трюдо вакилларини танқид қилиб, уларни «жирканч» деб атаган эди.