Тошкентда рухсатсиз ўрнатилган реклама, баннер ва пешлавҳалар олиб ташланмоқда

Қонунийликни таъминлаш ва пойтахтнинг меъморий яхлитлигини сақлаш мақсадида махсус хизматлар тегишли рухсат ҳужжатлари бўлмаган реклама конструкцияларини олиб ташламоқда.

Фото: Kun.uz

Тошкент шаҳрида рухсатсиз ўрнатилган ташқи реклама, баннер ва пешлавҳалар олиб ташланмоқда. Бу ҳақда шаҳар ҳокимлиги хабар берди.

Қайд қилинишича, қонунийликни таъминлаш ва пойтахтнинг меъморий яхлитлигини сақлаш мақсадида махсус хизматлар тегишли рухсат ҳужжатлари бўлмаган реклама конструкцияларини олиб ташламоқда.

Таъкидланишича, рухсатсиз ўрнатилган реклама тахталари, баннерлар ва пешлавҳалар ободонлаштириш қоидаларини бузиб, пойтахт кўчалари ва туманларининг кўринишини бузмоқда; Пиёдалар йўлаклари ва йўл четларини тўсиб қўйиб, айниқса кам ҳаракатланувчи фуқароларнинг юришини қийинлаштирмоқда; Йўл ҳаракати хавфсизлигига хавф туғдириб, йўл белгиларини кўришга халақит бермоқда; Муҳандислик тармоқларига, жумладан суғориш каналларига зарар етказиб, ёмғирли мавсумда ҳудудларнинг сув босишига сабаб бўлмоқда.

Шаҳар ҳокимлиги бизнес эгалари, якка тартибдаги тадбиркорлар ва ижарачилардан жарималар ва қўшимча харажатлардан сақланиш учун ноқонуний объектларни бартараф этишга чақиряпти.

Эслатилишича, ташқи рекламани жойлаштириш учун ягона қонуний асос - Тошкент шаҳри ваколатли органлари томонидан берилган ҳужжатлардир.

#Тошкент #реклама #тадбиркорлик