Россияда ёзувчи Дмитрий Биковга нисбатан жиноий иш очилди

Биков Россия армияси ҳақида «фейк» хабарларни тарқатишда гумон қилинмоқда. Ёзувчи 2021 йилда Россияни тарк этди ва Россиянинг Украинага бостириб киришини очиқ қоралади.

Дмитрий Биков Фото: Sergei Karpukhin/dpa/TASS/picture alliance

Россия Тергов қўмитаси ёзувчи Дмитрий Биковга нисбатан жиноий иш қўзғатди, дейилади 30 апрель, чоршанба куни ТҚ Москва бошқармаси сайтида эълон қилинган баёнотда.

Биков Россия армияси ҳақида «фейк» хабарларни тарқатишда гумон қилинмоқда. Тергов маълумотларига кўра, ёзувчи видеохостинглардан бирида «Россия Қуролли кучларининг Украина тинч аҳолисига қарши ҳаракатлари ҳақида атайлаб ёлғон маълумотлар»ни ўз ичига олган видеони эълон қилган.

Бундан ташқари, Биков, Тергов қўмитасининг таъкидлашича, «чет эл агенти фаолияти тартибини бузган ҳолда» ваколатли органга тақдим этилиши талаб қилинадиган маълумотларни тақдим этмаган. «Ҳозирда Биковга қидирув эълон қилиш масаласи кўриб чиқилмоқда», — дея таъкидлади Тергов қўмитаси.

Дмитрий Биков Россияни 2021 йилнинг кузида тарк этган ва 2022 йилдан буён АҚШда яшаб, ишлайди. Ёзувчи Россиянинг Украинага бостириб киришини қоралаб чиққан. 2022 йил июль ойида Россия Адлия вазирлиги Биковни «чет эл агентлари» рўйхатига киритди.

#Россия #Дмитрий Биков