Ҳиндистондаги меҳмонхонада ёнғин юз берди. Қурбонлар бор

Ҳиндистоннинг Ғарбий Бенгалия штатида жойлашган меҳмонхоналардан бирида юзага келган йирик ёнғин оқибатида ўндан ортиқ одам ҳалок бўлди, деб ёзади BBC.

Қайд этилишича, 29 апрел куни кечқурун Калкутта шаҳридаги Rituraj меҳмонхонасида ёнғин чиққан. Ҳодиса оқибатида камида 14 киши, жумладан, икки бола ҳалок бўлган. Шунингдек, яна икки киши жиддий жароҳат олган.

Полиция ёнғиннинг келиб чиқиш сабабларини аниқлаш учун махсус тергов гуруҳини тузган.

Маълум қилинишича, меҳмонхонада бўлган фуқаролар бино томига чиқиб олиб, телефонларидаги фонарлар орқали ёрдам сигналларини йўллаган. Ижтимоий тармоқларда тарқалган видеоларда одамлар оловдан қочиш учун ўз хоналари деразаларига чиқиб олганини кўриш мумкин.

Indian Express’га кўра, бинода қолиб кетган одамларни қутқариш учун ўт ўчирувчилар гидравлик нарвонлардан фойдаланган. Полициянинг қайд этишича, ҳалок бўлганларнинг аксарияти меҳмонлар бўлиб, улар ўз хоналаридан чиқишга улгурмаган.

Ҳиндистон бош вазири Нарендра Моди Х ижтимоий тармоғига ҳалок бўлганларнинг оилаларига компенсация тўланишини ёзиб қолдирди.

Эслатиб ўтамиз, 21 январга ўтар кечаси Туркиянинг Болу вилоятида жойлашган «Карталкая» тоғ-чанғи курортидаги Grand Kartal меҳмонхонасида ёнғин чиққанди. Ўшанда ёнғин оқибатида жами 78 киши ҳалок бўлган, яна 51 киши яраланган эди.