Австралияда юзлаб коалалар вертолётдан туриб ўққа тутилди

Ўрмон ёнғинларидан кейин кўплаб ҳайвонлар оғир жароҳат олган. Австралия расмийлари коалаларни азобдан қутқариш мақсадида уларни отиб ўлдириш бўйича қарор қабул қилган.

Фото: Shutterstock

Австралиянинг Виктория штатида ўтган ой давомида 750 га яқин коала отиб ўлдирилди, деб хабар беради Sky News.

Қайд этилишича, Budj Bim миллий боғидаги юзлаб ҳайвонлар ўрмон ёнғинидан кейинги режалаштирилган тадбирлар доирасида йўқ қилинган. Ўтган ой ёнғин натижасида у ерда 2 мингга яқин бутазор яксон бўлган. Маҳаллий ҳукуматнинг таъкидлашича, уларда шундай йўл тутишдан бошқа чора қолмаган — кўплаб коалалар оғир жароҳат олган, сувсизликдан азобланган ва очликдан ўлар ҳолатга келиб қолган.

Вертолётдан туриб ҳайвонларни ўққа тутиш операцияси штатда биринчи марта амалга оширилган. Штат бош вазири Жасинта Алланинг сўзларига кўра, нишонга олинган коалалар оғир аҳволда бўлган. Сиёсатчи уларни йўқ қилиш қарори тегишли баҳолашлардан кейин қабул қилинганини билдирди.

Расмийларнинг бу каби ҳаракати айрим ҳайвон ҳимоячилари томонидан танқид остига олинди. Koala Alliance раҳбари Жесс Робертсон вертолётдан туриб коаланинг аҳволи қандай эканини аниқлаш мумкинлигига шубҳа билдирган. Ҳайвонлар учун адолат партияси вакили Жоржиа Перселл эса вертолётдан туриб ҳатто коала ўз халтасида боласини кўтариб юрган ёки юрмагани ҳам кўринмаслигини таъкидлаган. Яъни бу каби ҳолатда коала болалари ҳам жабрланиши мумкин.

#Австралия #коала