Тошкентда икки фуқарони Мексика орқали АҚШга юборишни ваъда қилган чет эл фуқароси ушланди

Тошкентда пул эвазига ноқонуний йўллар орқали АҚШга юборишни ваъда қилган шахслар ушланди, деб хабар беради Бош прокуратура ҳузуридаги департамент.

Қайд этилишича, департаментнинг Чилонзор тумани бўлими ва ДХХ ходимлари ҳамкорлигида тезкор тадбирлар ўтказилган. Тадбирлар давомида чет эл фуқароси Н.С. фуқаролар З.Э. ва И.С.нинг ишончига кириб, уларни 40 минг доллар эвазига Мексика давлати орқали АҚШга чегарадан ўтказиб қўйишини айтиб, олдиндан 4 минг долларини олган вақтида ашёвий далиллар билан ушланган.

Шу каби, Ж.Т. ва Р.Т. исмли шахслар фуқаро М.А.нинг ишончига кириб, уни 18 минг доллар эвазига айланма йўллар орқали Қўшма Штатларга юборишини айтиб, олдиндан 5 минг долларни олган вақтида ашёвий далиллар билан қўлга тушган.

Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.

Эслатиб ўтамиз, март охирларида Сирдарё ва Навоий вилоятларида пул эвазига АҚШга ишга юборишни ваъда қилган шахслар ушланган эди.