Жаҳон | 17:23 / 17.04.2025
4797
4 дақиқада ўқилади

Айбдорлар «хит паради»да ўзгариш: Трамп илк марта Путинни урушнинг бош айбдори деб атади

Украина ва Россия ўртасидаги урушни тугатиш бўйича АҚШ президенти Доналд Трампнинг саъй-ҳаракатлари ҳеч қандай самара бермаяпти. Айниқса Москванинг ҳаракатларига қараганда улар Трампни жиддий қабул қилаётганга ҳам ўхшамайди. Балки шу учундир охирги чиқишида Трамп уруш учун айбдор уч кишининг рўйхатига Путинни ҳам қўшди.

Video thumbnail
{Yii::t(}
Ўтказиб юбориш 6s

Трамп уч кишини урушнинг асосий айбдори деб атади. Шу вақтгача Трампнинг «урушни бошлаганлар хит парадида» Байден биринчи, Зеленский иккинчи ўринда турарди. Бироқ шу кунларда Трамп илк марта Путин урушни бошлаганини тан олди. Энди Путин Трампнинг «айбдорлар рейтингида» кутилмаганда биринчи ўринга кўтарилди.

«Байден урушни тўхтатиши мумкин эди. Зеленский ҳам. Путин эса умуман урушни бошламаслиги керак эди. Барча айбдор. Миллионлаб одамлар шу уч кишини деб ҳалок бўлди. Путин майли, биринчи рақамли айбдор. Ҳеч нарсани тушунмайдиган Байден иккинчи. Ва Зеленский», деди Трамп.

Путинни урушнинг биринчи рақамли айбдори деган Трамп кўп ўтмай ўз услубида Украинани урушни бошлашда айблади. «Урушни бошлашдан аввал унда ғалаба қозона олишингизни билиш керак. Ўзингиздан 20 баробар катта давлатга қарши уруш очиб, кейин бизга ракета беринг, деб умид қилиб ўтириш ярамайди», деди Трамп.

«Украинага келинг, жаноб Трамп»

Трампнинг бу гапларни айтишидан аввалроқ Украина президенти Володимир Зеленский АҚШнинг CBS телеканалига интервю бериб, унда Трампни Украинага таклиф қилди.

«Биз сизнинг позициянгизни ҳурмат қиламиз, жаноб Трамп. Лекин илтимос, музокараларга оид бирор қарор қабул қилишдан аввал Украинага келинг, одамларга, тинч аҳолига, ҳарбийларга, касалхоналар, черковларга, болаларга, вайрон бўлган жойларга қаранг. Бу ерда нималар бўлганини ўз кўзингиз билан кўринг, шунда ким билан музокара ўтказаётганингиз, Путин нималар қилганини тушунасиз. Кейин биргаликда урушни тугатиш бўйича қарор қабул қиламиз», деди Зеленский.

Трамп «дедлайн»ни тасдиқлади

Охирги вақтларда Трамп Путинга ўт очишни тўхтатиш бўйича муддат бергани ҳақида хабарлар кўпайди. Трамп бу маълумотни тасдиқлади, лекин муддат қачонгача эканини айтмади. АҚШ давлат котиби Марко Рубио Вашингтон бир неча ой эмас, бир неча ҳафта ичида Москва чиндан урушни тугатишга интиляптими деган саволга жавоб топишини айтганди.

Америка нашрларига кўра, Доналд Трамп урушни тугатиш бўйича Путин билан уч марта учрашиб келган махсус вакили Стивен Уиткоффнинг позициясини қўлламоқда. Уиткофф урушни тугатиш учун Украина тўртта области ва Қримни Россияга қўшқўллаб топшириши, НАТОга кириш фикридан қайтиши, умуман Путин қўяётган барча шартларга кўниши керак деб ҳисоблайди. Wall Street Journal нашрининг ёзишича, давлат котиби Марко Рубио ва Украина бўйича махсус вакил генерал Кит Келлог Трампни Путин билан мулоқотда эҳтиёткорликка чорлаган. Яъни Оқ уйдаги мулозимларда ҳам урушни қандай тугатиш бўйича аниқ сценарий йўқ.

Шу ўринда Стивен Уиткоффнинг бир гапи эътиборни тортади. Унинг айтишича, Вашингтонда энди-энди Россия нима хоҳлаётгани ҳақида тушунча пайдо бўлаётган экан. Ваҳоланки, Россия Украинанинг 5 та ҳудудини қўшиб олишни исташи ва Уиткофф санаган бошқа шартларни аллақачон маълум қилиб бўлган, ҳатто Украинанинг бу беш ҳудудини ўз ерлари сифатида конституциясига киритиб қўйган. Бутун бошли Америка президентининг махсус вакили бўлмиш Уиткоффнинг гапидан келиб чиқадики, Трамп маъмуриятидагилар бутун дунё аллақачон тушуниб етган нарсани энди-энди тушунаётган экан. Ғалати одамлар, охирги 80 йилдаги энг даҳшатли урушни тугата олишларига уларнинг ўзи ҳам ишонмаса керак...

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.

Мавзуга оид