«Кураш ҳеч қачон тугамайди». Саида Мирзиёева оиладаги зўравонликка қарши қонунга киритилган ўзгартиришни олқишлади

Президент ёрдамчиси Саида Мирзиёева оиладаги зўравонликка қарши қонунга киритилган ўзгартиришларни олқишлаб, буни аёллар ҳуқуқларини ҳурмат қилиш йўлидаги катта қадам деб атади.

Саида Мирзиёеванинг маълум қилишича, 9 апрел — оиладаги зўравонликка қарши қонун қабул қилинганига икки йил тўлган кунда президент қонунчиликка никоҳдан ажратишда судлар томонидан тайинланадиган «яраштириш даври»ни бекор қилишга оид жуда муҳим ўзгартириш киритилишини тасдиқлаган. «Кураш ҳеч қачон тугамайди», — деб ёзади у ўзининг Telegram каналига.

Президент ёрдамчиси қонунга киритилган ушбу ўзгартиришни аёлларни оиладаги зўравонликдан ҳимоя қилиш, уларнинг ҳуқуқларини ҳурмат қилиш йўлидаги катта қадам деб ҳисоблашини таъкидлади.

Шу билан бирга, Саида Мирзиёева агар оилада инсон қадр-қиммати ҳурмат қилинмаса ва у жисмоний, психологик ёки иқтисодий таҳқирларга дуч келса, у ерда муросага келиш, ярашиш ҳар қанақасига имконсиз эканини қайд этди.

«Бу нафақат аёллар, балки шундай шароитда яшаётган ва тарбияланаётган болалар учун ҳам муҳимдир. Қонунчиликка ушбу тузатишлар киритилиши устида ишлаган катта жамоа сиз томонда.

Йўл қанчалик машаққатли бўлмасин, ўзингиз ва фарзандларингиз тинчлигини танланг. Ота-оналар эса шуни яхши тушуниб олишлари керак: қизингизнинг зўравонликдан қочиб уйга келиши эмас, балки зўравонликка тоқат қилишга мажбур бўлиши — ҳақиқий шармандаликдир», — деб ёзади Саида Мирзиёева.