Трампнинг махсус вакили Путин билан учрашиб, Россия—Украина урушини муҳокама қилади

Санкт-Петербургга учиб келган АҚШ президентининг махсус вакили Стив Уиткофф Владимир Путин билан музокаралар ўтказади. Бу ҳақда РФ президентининг матбуот котиби Дмитрий Песков маълум қилди.

Кремл вакилининг сўзларига кўра, учрашув мавзулари «Украина можаросини тартибга солиш масалалари» бўлади, музокаралар эса «президент Путин учун қанча вақт керак бўлса, шунча давом этади».

Шу билан бирга, Песков Уиткоффнинг Россияга навбатдаги ташрифини «ҳал қилувчи аҳамиятга эга деб атаб бўлмаслигини», учрашувдан катта бурилишлар кутиш керак эмаслигини айтди. Унинг қўшимча қилишича, бу РФ ва АҚШ дипломатик ишларининг давомидир.

Песковнинг таъкидлашича, РФ учун ушбу музокаралар — «Уиткоффга Россиянинг асосий позицияси ва асосий хавотирларини етказиш имкониятидир, бу масалалар кейинчалик президент Трампга етиб боради».

АҚШ президенти Доналд Трампнинг Яқин Шарқдаги махсус вакили Стив Уиткофф 11 апрел куни Санкт-Петербургга учиб келган. Бу унинг охирги икки ойдаги учинчи ташрифидир.

Axios’нинг ёзишича, Уиткофф Россияга Путин билан учрашиш учун келган. Нашр манбаларига кўра, Трамп Россия ва Украина тинчлик сулҳини тузмаганидан ҳафсаласи пир бўлган. Уларнинг таъкидлашича, ўт очишни тўхтатиш бўйича келишув апрел охирига қадар имзоланмаса, АҚШ Россияга қарши қўшимча санкцияларни жорий этиши мумкин.

Аввалроқ Олий Раданинг ташқи сиёсат ва парламентлараро ҳамкорлик қўмитаси раҳбари Олександр Мережко Уиткоффни Украинадаги можарони ҳал қилиш бўйича музокараларда иштирок этишдан четлатишни талаб қилганди. Украиналик депутат америкалик журналист Такер Карлсонга берган интервьюсидаги Уиткофф баёнотларини «шармандали ва ҳайратланарли» деб атаган.