Россияда такси иловаларида мигрант ҳайдовчини рад қилиш функцияси жорий қилиниши мумкин

Россия Давлат Думаси спикери ўринбосари Владислав Даванков такси агрегатор иловаларида йўловчиларга мигрант ҳайдовчи билан саёҳат қилишдан бош тортиш имконини берувчи функцияни жорий этишни ўйлаб кўришни таклиф қилди. Бу ҳақда РИА Новости хабар берди.

Даванков Россия транспорт вазири Роман Старовойтга шу мазмундаги хатни юборган. Давлат думаси спикери ўринбосарининг ёзишича, сўнгги пайтларда Россияда хориж фуқаролари, жумладан, такси ҳайдовчиси бўлиб ишлаётганлар томонидан содир этилган ҳуқуқбузарликлар сони кўпайган.

«Менимча, такси агрегатор иловаларида йўловчиларга мигрант ҳайдовчи билан саёҳат қилишдан бош тортиш имконини берувчи функцияни жорий этиш имкониятини кўриб чиқиш зарур», дейилади ҳужжатда.

Унинг фикрича, бу янгилик йўловчиларга қўшимча хавфсизлик ва ҳайдовчининг танлови устидан назоратни таъминлайди, бу эса, ўз навбатида, салбий ҳодисалар сонини камайтиришга ёрдам беради. Даванков сўзларига кўра, ушбу чоранинг амалга оширилиши таксичи бўлиб ишлаётган Россия фуқароларини қўллаб-қувватлайди, чунки йўловчилар бундай ҳайдовчиларга устунлик беради.

Россиянинг кўплаб ҳудудларида аллақачон мигрантларнинг такси соҳасида ишлашига тақиқ жорий қилинган. 2024 йилдан бошлаб бундай чекловлар қуйидаги ҳудудларда амал қилмоқда: Кемерово вилояти (Кузбасс), Курган вилояти, Магадан вилояти, Челябинск вилояти, Тюмен вилояти, Тула ва Калуга вилоятлари, Ханти-Мансийск автоном округи, Камчатка ўлкаси ва бошқалар.

Ушбу чора-тадбирлар Россия фуқароларини устувор иш билан таъминлаш ва йўловчи ташиш хавфсизлигини оширишга қаратилгани билан изоҳланган. Бироқ, экспертларнинг қайд этишича, бундай тақиқлар такси ҳайдовчиларининг етишмаслиги ва ноқонуний ташувчилар сонининг кўпайишига олиб келиши мумкин.