Трамп: Исроил Эронга қўшма зарба беришда етакчи бўлади

АҚШ ва Эрон расмийларининг ядровий келишувга қайтиш бўйича режалаштирилган учрашувидан бир неча кун олдин АҚШ президенти Доналд Трамп Теҳрон унинг ултиматумини қабул қилмаса, ҳарбий ҳаракатлар бошлаш ниятида эканлигини яна бир бор таъкидлади. Бу ҳақда Трамп 9 апрел, чоршанба куни журналистлар билан суҳбатда маълум қилди, дея хабар беради Associated Press.

Трамп Эроннинг гуллаб-яшнаши ва «буюк бўлишини» исташини, бироқ мамлакатнинг ядро қуролига эга бўлишига йўл қўймаслигини айтди. Теҳрон гўё буни тушунади, деди АҚШ президенти. У, шунингдек, агар керак бўлса, ҳарбий куч ишлатишга ваъда берди ва Исроил эҳтимолий ҳужумда иштирок этишини айтди.

«Агар буни ҳарбий йўл билан қилиш керак бўлса, биз буни ҳарбий йўл билан қиламиз. Исроил бу борада жуда фаол бўлиши аниқ. Улар бу борада етакчи бўлади. Лекин бизни ҳеч ким етакламайди. Биз хоҳлаганимизни қиламиз», — деб ишонтирди Трамп.

Эрон Трампнинг такрорий таҳдидларига жавобан АҚШга «қаттиқ жавоб» беришни ваъда қилди ва Вашингтонни кескинлашувдан воз кечишга чақирди. Эрон ташқи ишлар вазири Аббос Арағчи Washington Post газетаси рукнида: "Биз президент Трампнинг Яқин Шарқдаги ҳалокатли урушга ботган яна бир АҚШ президенти бўлишни хоҳлаётганини тасаввур қила олмаймиз", деб ёзди.

Трамп ўзининг биринчи муддатида Қўшма Штатларни ядровий келишув деб номланувчи 2015 йилдаги Қўшма кенг қамровли ҳаракатлар режасидан бир томонлама олиб чиқди. Шундан сўнг АҚШ президенти Теҳрон келишувнинг ўзига тегишли қисмини бажармаётганини таъкидлаб, келишувнинг ўзини «ёмон» деб атади.