Эстония президенти Россия ва Беларус фуқароларининг маҳаллий сайловларда овоз беришини тақиқловчи қонунни тасдиқлади

Эстония президенти Алар Карис учинчи давлат вакиллари, жумладан, Россия ва Беларус фуқароларини муниципал сайловларда овоз бериш ҳуқуқидан маҳрум қилувчи қонунни тасдиқлади. Эстония конституциясига бу борадаги тегишли ўзгартириш киритилди, деб хабар беради ERR.

Қонун, шунингдек, фуқаролиги бўлмаган шахсларни ҳам овоз бериш ҳуқуқидан маҳрум этади. Киритилган ўзгартиришларга мувофиқ, улар 2025 йил 19 октябрда бўлиб ўтадиган сайловларда охирги маротаба иштирок этишлари мумкин, 2029 йилги сайловларда эса қатнаша олмайди.

«Маҳаллий сайловларда Эстония ва Европа Иттифоқи фуқаролари овоз бериши мумкинлиги тўғрисидаги қарор, шубҳасиз, қонуний. Овоз бериш ҳуқуқидан маҳрум бўлганлар давлат уларни жамият ҳаётидан четламоқчи ёки уларда хавфсизлик учун таҳдидни кўряпти деб ўйламасликлари ҳам муҳим», — дейди Эстония президенти.

Унинг сўзларига кўра, парламент депутатлари «жуда жиддий оқибатларга эга қарорни қабул қилган, улар келажакда ягона эстон жамияти ҳимояси ҳақида ўйлаган бўлиши мумкин».

Эстония парламенти учинчи давлат фуқароларини овоз бериш ҳуқуқидан маҳрум қилувчи қонунни 26 март куни ўтказилган йиғилишида қабул қилганди.

Эстония ИИВнинг 2024 йил 1 ноябрдаги маълумотларига кўра, мамлакатда 78 мингдан ортиқ Россия, 2,6 мингдан зиёд Беларус фуқаролари ва 60,5 минг фуқаролиги бўлмаган шахслар истиқомат қилади.

Эстонияда маҳаллий ўзини ўзи бошқариш йиғинларига сайловлар ҳар тўрт йилда бўлиб ўтади. Парламент депутатларининг ҳисоблашича, бу вақт давомида Эстония фуқароси бўлмаган шахслар фуқаролик олиш учун ариза беришлари мумкин.