Трамп Россиядан Украинани бомбалашни тўхтатишни талаб қилмоқда

АҚШ президенти Доналд Трамп Россияни Украинани бомбардимон қилишни тўхтатишга чақирди. «Биз Россия билан гаплашяпмиз. Улар тўхташини истардик. Менга бомбалашлари ёқмайди. Бомбардимон қилиш эса давом этмоқда ва давом этмоқда. Ҳар ҳафта одамлар ва минглаб ёшлар ҳалок бўлмоқда», – деди Трамп журналистларнинг Россия билан музокаралар ҳақидаги саволига жавоб бераркан.

6 апрел куни Air Force One самолёти бортида ОАВ вакиллари билан мулоқот чоғида Трамп уруш – «ҳеч қачон бошланмаслиги керак бўлган даҳшатли нарса» экани ҳақидаги сўзларини такрорлади. Унинг сўзларига кўра, агар 2022 йилда президент лавозимини у эгаллаганида, уруш бошланмаслиги 100 фоизга кафолатланган бўларди.

Кремл Трампнинг сўзларига жавобан Россия президенти Владимир Путин «ўт очишни тўхтатиш зарурлиги ҳақидаги ғояни қўллаб-қувватлашини, бироқ бунгача бир қатор саволларга жавоб бериш кераклиги»ни айтди. РФ президенти матбуот котиби Дмитрий Песков 7 апрел куни журналистлар учун ўтказилган брифингда шундай баёнот берди.

«Бу саволлар ҳеч ким жавоб бермагунича ҳавода муаллақ турибди. Бу Киев режимининг назоратсизлиги билан ҳам, Киев режими ўзига бўйсунмайдиган бир қатор экстремистик ва миллатчи бўлинмаларнинг ҳаракатларини назорат қила олмаслиги билан ҳам боғлиқ. Бу Киевни янада ҳарбийлаштириш режалари ва ҳоказо ва ҳоказолар билан ҳам боғлиқ», – деди Песков (иқтибос «Вы слушали Маяк» телеграм-каналидан).

Ўт очишни тезроқ тўхтатиш зарурлиги ҳақидаги фикрга қўшилган ҳолда, биз ўз манфаатларимизни таъминлашимиз ва мен айтган жиҳатларга ойдинлик киритишимиз керак.

РФ қуролли кучлари мунтазам равишда Украина ҳудудларига зарбалар бермоқда. Сўнгги вақтлардаги энг ҳалокатли зарбалардан бири 4 апрел куни кечқурун «Искандер-М» ракета комплексидан учирилган Россия ракетаси Кривий Риҳдаги турар жой кварталига келиб тушиши бўлди. Сўнгги маълумотларга кўра, 20 киши ҳалок бўлган, 70 дан ортиқ киши жароҳатланган. Украина расмийлари турар жой бинолари зарбага учраганини маълум қилди. Россия мудофаа вазирлиги шаҳардаги ресторанлардан бирида йиғилиш ўтказаётган украиналик ҳарбийлар ҳужум нишони бўлганини иддао қилди.

Дмитрий Песков 7 апрел куни Кривий Риҳга зарба берилгани ҳақидаги саволга жавоб бераркан, журналистларга Россия ҳарбийлари «фақат ҳарбий ва урушга алоқадор нишонларга зарба бераётгани»ни айтди. «Ижтимоий объектларга, ижтимоий инфратузилма объектларига ҳеч қандай зарба берилмаяпти», – деди Песков. Шу билан бирга, уч йилдан ортиқ уруш давомида Украинадаги ижтимоий объектлар мунтазам равишда рус ҳарбийлари зарбаларига нишон бўлиб келмоқда.

АҚШ феврал ойи ўрталарида Россия ва Украина билан урушни тугатиш бўйича музокараларни бошлади. Ўшандан бери Доналд Трамп Владимир Путин ва Володимир Зеленский билан бир неча бор алоҳида гаплашди, уч давлат вакиллари Саудия Арабистонида бир неча бор музокара ўтказди.

Россия ва Украина АҚШнинг энергетика инфратузилмаларига зарба бериш бўйича таклифига рози бўлган (аммо мунтазам равишда бир-бирини мораторийни бузишда айблаб келади). АҚШ ва Украина томонлар Қора денгизда сулҳга амал қилиш бўйича келишиб олишганини хабар қилган. Россия эса фақат қишлоқ хўжалиги маҳсулотлари экспорчиларига қўйилган санкциялар бекор қилингач ҳамда Росселхозбанк Европа юрисдикциясида ишловчи SWIFT тизимига улангачгина денгиздаги сулҳга рози бўлишини билдирган.

Шу билан бирга, Россия АҚШнинг ўт очишни тўхтатиш режими киритиш бўйича Украина рози бўлган таклифига рози бўлмаган.