Бербок: Германия ҳукумати «Шимолий оқим-2» қайта ишга туширилишига қарши

Германия раҳбарияти «Шимолий оқим-2» газ қувурини ишга тушириш имкониятини муҳокама қилмаяпти, аввалроқ Христиан-демократик иттифоқдан бўлган айрим сиёсатчилар ва ОАВ бу борада баёнот берганди. Бу ҳақда Германия ташқи ишлар вазири вазифасини бажарувчи Анналена Бербок 1 апрел, сешанба куни Киевда Украина президенти Володимир Зеленский билан бўлиб ўтган матбуот анжуманида маълум қилди.

«Шимолий оқим-2» бўйича нотўғри қарор бизга, немис жамиятига жуда қимматга тушди. 24 февралгача (2022 йил) биз доимий равишда жиддий огоҳлантиришлар олдик, айниқса Шарқий Европадаги ҳамкорларимиз ва дўстларимиздан – Украинадан, Болтиқбўйи давлатларидан, Полшадан – бу газ қувури иқтисодий лойиҳа эмас, балки кейинги агрессияга хизмат қилиши бўйича», - деди Бербок.

«Биз жамият сифатида бунинг учун катта нарх тўладик. Чунки биз Россия гази ва нефтидан мустақил бўлишимиз керак эди. Ахир, Россия президентининг ўзи — буни унутмаслик керак — бу газ қувурини Европа ва Германияга қарши қўйиб қўйди. Унинг ўзи ҳам бу газ қувуридан бошқа фойдаланишни истамаслигини тан олди. Ва бунинг учун биз миллиардлаб евро тўладик. Энди бу қувурни қайта ишга тушириб бўлмаслиги аниқ», - дея қўшича қилди Германия Ташқи ишлар вазирлиги раҳбари.

«Бу Германиянинг қўлидаги қарор. Бу қарор аввалги ҳукумат («светофор» коалицияси) томонидан ҳозирги ҳукмрон партия (ХДИ/ХСИ блоки) билан мутлақ келишилган ҳолда қабул қилинган. Айнан Украинага нисбатан сиёсатда турли демократик партиялар ўртасида тўлиқ консенсусни кўриш мумкин», деб ишонтирди сиёсатчи.

«Мен яна бир бор таъкидламоқчиманки, Европа хавфсизлиги ва иқтисодий хавфсизлиги бир-бири билан чамбарчас боғлиқ. Россиянинг агрессив уруши буни жуда яққол кўрсатди. Бу барча Европа давлатларини иқтисодий ва молиявий жиҳатдан ақл бовар қилмайдиган даражада қийин ҳолатга солиб қўйди. Биз буни бошқа геосиёсий масалаларда ҳам кўриб турибмиз. Шунинг учун бу соф иқтисодий лойиҳа, деган мантиқ энди мавжуд бўлиши мумкин эмас. Чунки бу бизнинг хавфсизлигимизга таҳдид солади», дея хулоса қилди Бербок.