Кремль Трампнинг Путиндан «жаҳли чиққани» ҳақидаги иддаоларга жавоб қайтарди

Кремль АҚШ президенти Доналд Трампнинг Россия президенти Владимир Путиндан дарғазаб бўлгани ҳақидаги хабарларга изоҳ берди. Аввалроқ, Трамп тинчлик келишувини имзолашни кечиктираётган ва Украина президенти Владимир Зеленскийнинг ҳокимиятдан четлатишни талаб қилаётган Путиндан «дарғазаб бўлгани» ҳақида хабар берилган эди.

Россия президенти Владимир Путиннинг матбуот котиби Дмитрий Песков сўзларига кўра, «Трамп тўғридан-тўғри шундай демаган».

«Баъзи баёнотлар ҳикоя сифатида берилди, иқтибос кўринишида эмас. Бу биринчидан. Иккинчидан, дарҳақиқат аслида бир нечта турли баёнотлар берилди... Биз Америка томони билан, биринчи навбатда, аввалги маъмурият даврида жуда катта зарар кўрган икки томонлама муносабатларимизни тиклаш устида ишлашда давом этамиз», деди Песков.

У, шунингдек, «Украинани тартибга солиш билан боғлиқ баъзи ғояларни амалга ошириш бўйича иш олиб борилаётганини» қўшимча қилди, аммо ҳозирча аниқ натижалар йўқ. Шу билан бирга, унинг сўзларига кўра, Путин ва Трампнинг янги суҳбати ҳозирча режалаштирилмаган.

«Иш давом этмоқда, ҳозирча сизга маълум қилишимиз керак бўлган аниқ маълумотлар йўқ. Бу мавзунинг мураккаблиги туфайли вақт талаб этадиган жараён. Президент Трамп билан алоқаларга мутлақо очиқ. Зарурат юзага келса, уларнинг суҳбати зудлик билан ташкил этилади», деди Песков.

Аввалроқ, Трамп NBC News телеканалига берган интервьюсида Путиндан тинчлик музокараларини чўзиб юбораётгани учун «дарғазаб» эканини айтди ва агар бу давом этса, Москвага босимни кучайтириши билан таҳдид қилган эди. У, шунингдек, Путиннинг Украина президенти Владимир Зеленскийни танқид қилганидан «ғазабланганини» қўшимча қилиб, Путин «хоҳлайдими-йўқми» Зеленский билан келишиб олиши кераклигини таъкидлади.