Google’нинг Gemini сунъий интеллект сервиси барча фойдаланувчилар учун бепул бўлди

Google компанияси барча Gemini иловаси фойдаланувчиларига Gemini 2.5 Pro нейротармоғининг тажриба версиясидан бепул фойдаланиш имкониятини тақдим этди. Мазкур қарор кутилмаган бўлди, чунки ушбу сунъий интеллект алгоритми атиги бир неча кун олдин Google томонидан «энг ақлли сунъий интеллект модели» сифатида тақдим этилганди.

Қайд этилишича, Gemini 2.5 Pro нафақат сўровларга жавоб бериш, балки мантиқий фикрлаш ва таҳлил қилиш қобилиятига ҳам эга. Gemini 2.5 Pro ҳозирча тажриба босқичидаги лойиҳа бўлсада, аллақачон иловалар билан интеграция, файлларни юклаш ҳамда Canvas билан ишлаш каби асосий функцияларни қўллаб-қувватламоқда. Дастлаб, ушбу алгоритм фақат пуллик Gemini Advanced обуначиларига тақдим этилган эди, бироқ дам олиш кунлари Google уни барча Gemini фойдаланувчилари учун очиш режаси борлигини эълон қилди.

Ҳозирнинг ўзида Gemini 2.5 Pro имкониятларини Gemini.google.com сайтида синаб кўриш мумкин, тез орада эса нейротармоқ Android ва iOS учун мўлжалланган Gemini иловаларида ҳам пайдо бўлади. Google вакиллари компания ўзининг энг илғор сунъий интеллект моделини иложи борича тезроқ кенг фойдаланувчилар аудиториясига тақдим этишни мақсад қилганини таъкидлади.

Қайд этилишича, ҳозирда Gemini 2.5 Pro фойдаланувчиларнинг баҳоларига асосланган LMArena рейтингида етакчилик қилмоқда. Ушбу алгоритм математика (AIME 2025) ва илмий (GPQA diamond) тестларида ҳам биринчи ўринда турибди. Бундан ташқари, Google нейротармоқнинг дастурлаш бўйича кўникмаларини яхшилаш устида фаол ишламоқда.

Ҳозирча Google Gemini 2.5 Pro’нинг доимий версиясини бутунлай очиқ ва бепул қилишни режалаштиряптими ёки бу фақат сунъий интеллект моделини синовдан ўтказиш жараёнининг бир қисмими — номаълум. Бу борада компания ҳали расмий изоҳ бермади.