Украина Россиянинг янги юришига тайёрланмоқда

Россия ҳарбийлари яқин ҳафталарда Киевга босимни кучайтириш ва Москванинг музокара позицияларини мустаҳкамлаш мақсадида янги ҳужумни ривожлантиришга тайёрланмоқда, деган Украина ҳарбийлари ва таҳлилчилари Associated Press нашрига.

Агентлик суҳбатдошлари таъкидлашича, Кремл минг километрга чўзилган бутун фронт чизиғи бўйлаб кўп векторли ҳужумга тайёрланмоқда. Таҳлилчи Алексей Гетманнинг ҳисоб-китобларига кўра, Россия олти ойдан тўққиз ойгача – яъни деярли бутун 2025 йил давомида давом этиши кўзда тутилган ҳужумга тайёрланмоқда.

27 март куни Украина президенти Володимир Зеленский Париждаги саммитда украин разведкаси маълумотларига кўра, Россия Украина шарқида — Суми, Харкив ва Запорижжя областларида баҳорги юришга тайёргарлик кўраётгани ҳақида гапирганди. Кейинги куни у Украина қуролли кучлари РФ қўшинларининг Суми областига босқинини қайтаришга тайёрланаётганини айтди. «Бу рўй бериши факт эмас, аммо биз тайёр турамиз», — деганди у.

Зеленский Россиянинг эҳтимолий ҳужумга тайёргарлигини АҚШ билан музокараларни чўзиш ва Украинанинг янги ҳудудларини эгаллаш учун вақт ютишга уринишлар билан боғлаган. «Катта еттилик» (G7) давлатларининг Киевдаги икки дипломати ҳам AP билан суҳбатда унинг фикрига қўшилган.

Украина ҳарбийлари Россиянинг ҳужумга тайёргарлик аломатларини сўнгги пайтларда РФ қўшинлари ўз позицияларини яхшилаш учун ҳужумларни кучайтирганида кўрмоқда. Бундан ташқари, Россия Украинанинг келажакдаги ҳужумига тўсқинлик қилиши мумкин бўлган ўт очиш нуқталари, учувчисиз тизимлар ва бошқа мудофаа салоҳиятини аниқлаш ва йўқ қилиш учун разведка миссияларини фаоллаштирди, дейилади мақолада.

AP билан суҳбатлашган украиналик командирларнинг баъзилари Россия Украина қуролли кучлари чиқиб кетган Курск областидаги ўз кучларининг бир қисмини бошқа ҳудудларга ташлаши мумкинлигидан ҳам хавотирда. «Бу қийин бўлади. Курскдан келган россияликлар у ерда эришилган ғалабалар туфайли кўтаринки руҳда бўлади», – дейди Украинанинг Донецк областидаги баталёни командири.

Associated Press Россия томони АҚШнинг Украина билан 30 кунлик сулҳ таклифини амалда рад этгани, Қора денгизда ўт очишни тўхтатиш бўйича келишув эса россиялик музокарачилар ўз шартларини илгари сурганидан кейин муаллақ ҳолатда қолганини қайд этган. Кремл Қора денгиздаги сулҳга фақат қишлоқ хўжалиги маҳсулотлари экспортчиларидан санкциялар олиб ташлангач ва Росселхозбанк SWIFT тизимига улангандан кейингина рози бўлишини айтмоқда.