Зеленский Киевда тинчликпарвар кучлар бўйича йиғилиш ўтказилишини эълон қилди 

Киевда Украинага тинчликпарвар кучларни юборишга тайёр бўлган давлатлар бош штаблари вакиллари билан учрашув бўлиб ўтади. Бу ҳақда Украина президенти Володимир Зеленский 28 март, жума куни бўлиб ўтган брифингда маълум қилди. У гап «жуда тор доирадаги давлатлар», жумладан, Буюк Британия ва Франция ҳақида кетаётганини таъкидлади, деб ёзади «РБК Украина».

Зеленскийнинг сўзларига кўра, учрашув бир ҳафта ичида бўлиб ўтиши керак. «Биз ўз инфратузилмамизни кўрсатамиз, ҳамкорлар билан ишлаймиз ва умумий қарашларимизни ишлаб чиқамиз. Шундан сўнг зудлик билан ҳарбий даражада эмас, балки миллий хавфсизлик бўйича маслаҳатчилар даражасида учрашув ўтказилишига келишиб олдик», — дея қўшимча қилди у.

Британия бош вазири Кир Стармер 15 март куни Европа Иттифоқи етакчилари ва НАТО вакилларининг онлайн саммити чоғида Украина учун 10 мингдан ортиқ кишилик Ғарб тинчликпарвар кучларини яратиш режасини айтиб ўтди, дея хабар беради Британия матбуоти.

Зеленский яна Москвани урушни тугатишни истамасликда айблади

17 март куни Украина президенти Володимир Зеленский яна бир бор Россияни урушни тугатишдан манфаатдор эмасликда айблади. «Ушбу ҳафтада бизнинг шаҳарлар ва жамоатларимизга юзлаб ҳужумлар уюштирилди. Руслар 1020 дан ортиқ ҳужумкор учувчисиз учоқлар, деярли 1360 та бошқариладиган ҳаво бомбалари ва 10 дан ортиқ турли ракеталарни учирди. Урушнинг тезроқ тугашини истаганлар бундай қилмайди», деб ёзди Зеленский ижтимоий тармоқда.

Украина президенти яна бир бор бутун цивилизациялашган дунё «Россияни ўз агрессиясини тўхтатишга мажбурлаш учун унга биргаликда босим ўтказиши» зарурлигини, янги «ҳал қилувчи чоралар», жумладан, санкцияларни кучайтириш кераклигини таъкидлади. «Украина, Европа, Америка ва дунёда тинчликни истаган ҳар бир киши – биз биргаликда адолатли ва мустаҳкам тинчликни таъминлай оламиз», — дея хулоса қилди у.

Бундан уч кун аввал Зеленский Кремлни Россия ва Украина ўртасида АҚШ ташаббуси билан тузилган тинчлик келишувини атайлаб кечиктиришда айблаган эди. «Афсуски, бир кундан ортиқ вақтдан бери (Жиддадаги учрашувдан кейин) дунё билдирилган таклифлар юзасидан Россиядан мазмунли жавоб эшитмаяпти. Бу эса айнан Россия урушни давом эттиришга интилаётганини ва тинчлик бошланишини имкон қадар кечиктиришга ҳаракат қилишини яна бир бор тасдиқлайди», — деб ёзди у 13 март куни. Украина президенти, шунингдек, «АҚШ босими Россияни урушни тугатишга мажбур қилиш учун етарли бўлишига» умид билдирди.