Исроилда ҳукуматга қарши намойишлар қайта бошланди

Исроилда минглаб одамлар суд ислоҳоти доирасида қабул қилинган мунозарали қонунга қарши норозилик билдирмоқда. Намойишчилар, шунингдек, гаровга олинганлар учун Ҳамас билан келишувга эришишни талаб қилмоқда.

Фото: Yair Palti/Anadolu/picture alliance

Исроил шаҳарларида 27 март, пайшанба куни судяларни тайинлаш жараёнида сайланган мансабдор шахсларнинг ваколатларини кенгайтирувчи зиддиятли қонунга қарши бўлган минглаб кишилар яна кўчаларга чиқди. Бундан ташқари, намойишчилар гаровга олинганларни озод қилиш учун Исроил Ғазо секторида ҳарбий операция ўтказаётган Ҳамас ҳаракати жангчилари билан келишувга эришишни талаб қилди, деб хабар беради dpa агентлиги.

Аввалроқ, суд-ҳуқуқ ислоҳотининг асосий қонунларидан бирини соатлаб давом этган мунозаралардан сўнг Кнессетнинг 120 аъзосидан 67 нафари қўллаб-қувватлаган, бир депутат эса қарши чиққанди. Мухолифат овоз беришни бойкот қилди.

Қонун қабул қилиниши Исроил бош вазири Бинямин Нетаняҳуга 2023 йилда мамлакат тарихидаги энг йирик норозилик намойишларидан бирига сабаб бўлган мунозарали суд-ҳуқуқ ислоҳотларини давом эттириш имконини беради. 2023 йил 7 октябрда Ҳамас жангчиларининг Исроилга ҳужуми ва Ғазода ҳарбий операция бошланганидан сўнг ислоҳотни илгари суриш тўхтатилди.

#намойиш #Исроил