Пхенян янги турдаги зенит-ракета тизимини синовдан ўтказди

Синовларни КХДР етакчиси Ким Чен Ин кузатиб борди ва ихтирочиларга ўз миннатдорчилигини билдирди.

КХДР янги зенит-ракета тизимини муваффақиятли синовдан ўтказди. Корея Марказий телеграф агентлигининг маълум қилишича, синовда мамлакат раҳбари Ким Чен Ин ҳам иштирок этган.

«КХДРнинг Ракетасозлик бош бошқармаси 20 март куни энг янги зенит-ракета тизимининг комплекс жанговар хусусиятларини текшириш учун синов учиришини ўтказди», — дейилади хабарда.

Таъкидланишича, тегишли мудофаа саноати корхонаси томонидан ушбу тизимни серияли ишлаб чиқариш бошланган.

Агентликнинг қайд этишича, синов жараёни тизимнинг «тезкор жанговар реактивлиги устунлиги» ҳамда унинг ишончлилигини тасдиқлаган.

Синовларни КХДР етакчиси Ким Чен Ин бевосита кузатиб борган. У Шимолий Корея армияси «ажобий жанговар хусусиятларга эга навбатдаги муҳим мудофаа қуроли билан таъминланишини» маълум қилиб, ихтирочиларга миннатдорчилик билдирган.

Эслатиб ўтамиз, январ охирларида Ким Чен Ин КХДР ядровий қалқонини мустаҳкамлашни буюрганди. Унинг айтишича, ядровий материаллар ишлаб чиқариш режасини янада ошириш ва «мамлакатнинг ядровий қалқонини мустаҳкамлашда новаторлик натижаларига эришиш» керак.

#КХДР #Ким Чен Ин