Зеленский кўчада туриб мурожаат қилди

Володимир Зеленский Киевда кўчада туриб украинларга мурожаат йўллади ва ўз амалдорларига америкалик ҳамкасблар билан боғланиб, ҳарбий ёрдам борасида жавоб олишни топширганини маълум қилди.

«Бугун кўпчиликда савол бор — Америка ёрдами бўйича энди нима бўлади. Мен Украина мудофаа вазирига, разведкаларимиз бошлиқларига, дипломатларга АҚШдаги ҳамкасблари билан боғланиб, расмий маълумот олишни буюрдим. Одамлар тахмин қилмаслиги керак. Украина ва Америка ҳурматли диалогга муносиб», — деди Зеленский.

Унинг таъкидлашича, Украина бир неча ҳафта ичида «турли сигналлар олган», гуманитар ва ҳарбий ёрдамнинг тўхтатилиши билан боғлиқ воқеа январ охирларида кузатилган, аммо «унда барчасини тезда қайта тиклашга муваффақ бўлинган».

«Ҳозир 2022 йил эмас. Ҳозир бизнинг барқарорлигимиз юқори, ҳимоя учун воситаларимиз бор, аммо урушни ҳақиқатда тугатиш учун бизга Америка билан яхши шериклик муносабатлари муҳим», — дейди Зеленский. Шунингдек, у Украина кўрсатилаётган барча қўллаб-қувватлов учун Америкадан доим миннатдор бўлишини қўшимча қилди.

Зеленскийнинг фикрича, Россия ўз позициясини ўзгартирмаган ва украин армиясининг қисқартилиши ҳамда Украина ҳудудларидан қонуний воз кечилишини талаб қилиш ниятида. «Барчамиз Украинада эканмиз, биргаликда ва мустаҳкам туришни давом этамиз, шу ерда эканмиз — буни ҳеч ким уддалай олмайди», — дейди Зеленский.

4 март куни Америка ОАВ ўз манбаларига таяниб, Доналд Трамп Украинага ҳарбий ёрдам кўрсатишни тўхтатгани ҳақида ёза бошлади. Бу Оқ уйда Зеленскийнинг Трамп ва вице-президент Жей Ди Вэнс билан юз берган тортишувидан бир неча кун ўтиб содир бўлмоқда.

Аввалроқ Зеленский мурожаат эълон қилиб, Оқ уйдаги учрашув «кутилганидек бўлмаганини» тан олиб, бундан афсусда эканини маълум қилганди. У Украина «урушга чек қўйиш учун тез ишлашга тайёрлиги» ва Трамп маъмурияти билан ҳамкорлик қилиш ниятида эканини маълум қилди.