Трамп афғонистонлик «Бош террорчи» ҳибсга олинганини эълон қилди

АҚШ президенти Доналд Трамп 2021 йилда Кобул аэропортида 13 нафар америкалик ҳарбий ва камида 170 нафар афғоннинг ўлимига сабаб бўлган портлашда иштирок этган «бош террорчи» қўлга олинганини маълум қилди. Бу ҳақда CNN хабар берди.

«Мамнуният билан эълон қиламанки, бугун тунда биз ушбу ваҳшийлик учун жавобгар бўлган бош террорчини қўлга олдик ва у ҳозир Америка адлиясининг шамширига дуч келиш учун шу ерга йўл олди», деди Трамп АҚШ Конгрессидаги нутқида.

Террорчи Покистонда қўлга олинган, расмийлар уни ушлашда АҚШ Марказий разведка бошқармаси маълумотларига таянган. Трамп Покистонга «бу йиртқич ҳайвонни қўлга олишда ёрдам бергани учун» миннатдорчилик билдирди.

Ўз навбатида, Покистон бош вазири Шаҳбоз Шариф «Покистоннинг Афғонистондаги терроризмга қарши курашдаги роли ва қўллаб-қувватлашини тан олгани ва қадрлагани учун» Трампга миннатдорчилик билдирди. Унинг сўзларига кўра, хавфсизлик кучлари «Покистон-Афғонистон чегараси ҳудудида муваффақиятли ўтказилган операция натижасида» Афғонистон фуқароси Шарифуллоҳни қўлга олган. «Биз минтақавий тинчлик ва барқарорликни таъминлаш учун Қўшма Штатлар билан яқин ҳамкорликни давом эттирамиз», деб қўшимча қилди Шариф.

Вазиятдан хабардор бўлган CNN телеканалига кўра, ҳибсга олинган Муҳаммад Шарифуллоҳ Қўшма Штатларга олиб кетилади ва «терроризмга моддий ёрдам кўрсатиш учун тил бириктириш» айби қўйилади.

ФҚБ томонидан ўтказилган сўроқда Шарифуллоҳ 2016 йилда ИШИД-Хуросон томонидан ёлланганини ва бир неча ҳалокатли ҳужумларни режалаштиришда иштирок этганини тан олгани таъкидланмоқда. Айблов хулосасида унинг бошқа ҳужумлар, жумладан, Кобулдаги элчихона қўриқчиларига ҳужум ва Москвадаги тунги клубга уюштирилган ҳужумга алоқадорлиги кўрсатилган.

Шарифуллоҳ 2019 йилдан бери қамоқда эди. 2021 йилда қамоқдан чиққан ва 2 ҳафтадан кейин Кобул аэропортидаги терактни уюштиргани таъкидланмоқда. Озод қилинганидан сўнг ИШИД аъзолари у билан боғланиб, ҳужумга тайёргарлик кўришда ёрдам сўраган. Шарифуллоҳга аэропортга борадиган йўлни ўрганиш, назорат-ўтказиш пунктлари ва юзага келиши мумкин бўлган хавфларни текшириш вазифаси юкланган. У ИШИД аъзоларига маршрут ҳужумчи учун хавфсиз эканини айтган, шундан сўнг унга аэропорт ҳудудини тарк этишга буйруқ берилган. Кейинроқ у теракт ҳақида эшитиб, унинг ижрочисини таниган. У ўзи билан қамоқда бирга ўтирган шахс бўлиб чиққан.

Террор ҳужуми 2021 йил 26 август куни содир бўлган. Хорижликларни ва хорижий кучлар билан ҳамкорлик қилаётган афғонларни шошилинч ва тартибсиз эвакуация қилиш чоғида Кобул аэропортининг шарқий дарвозаси яқинида ИШИД ҳужумчиси ўзини портлатиб юборди. Шу вақтда у ерда юзлаб афғонлар тўпланиб, эвакуация рейсларидан бирига чиқишга ҳаракат қилишган ва ўнлаб америкалик ҳарбийлар тартибни сақлаб турган эди. Бу теракт қурбонлари сонининг нега кўп бўлганини тушунтиради. 2023 йил апрель ойида ушбу теракт ташкилотчиси йўқ қилингани ҳақида хабар берилган эди.