Берунийда кучли шамол кўп қаватли уйнинг томини учириб юборди

Қорақалпоғистоннинг Беруний туманида кузатилган кучли шамол кўп қаватли уйнинг том қисмини учириб кетди. Ҳолат юзасидан туман ҳокимлиги расмий муносабат билдирди.

Маълум қилинишича, ҳолат бугун, 3 март куни соат 6:40 атрофида содир бўлган. Кучли шамол туманнинг Наврўз маҳалласида жойлашган кўп қаватли уйнинг тахминан 500 квадрат метр туника шифер бостирмасини учириб юборган. Бунинг оқибатида “дом” олдида турган Nexia, Spark, Damas машиналари ҳамда электр мотоциклга зарар етган.

Ҳодиса оқибатида тан жароҳати олган фуқаролар йўқ.

Ушбу кўп қаватли уй 1996 йилда қурилган бўлган. Унинг том қисми эса 2022 йилда туника шифер билан қопланган.

Ҳозирда воқеа жойида туман ФВБ бўлими ходимлари тозалаш ишлари олиб бормоқда. Махсус ишчи гуруҳ томонидан етказилган зарар аниқланиб, томни асл ҳолатига қайтариш бўйича ишлар олиб борилаётгани билдирилган.

Олдинроқ Жиззах вилоятининг Бахмал туманида “Open budget” пулига қурилган янги стадион 15 кунда қулаб тушгани хабар қилинганди.