Зеленский ва Трамп ўртасидаги тортишув АҚШнинг Украинага бутун ёрдамини хавф остида қолдирди

28 феврал куни Оқ уйда АҚШ ва Украина президентлари Доналд Трамп ва Володимир Зеленский ўртасида учрашув бўлиб ўтди, унда табиий ресурслар бўйича келишув имзоланиши кутилган эди.

Учрашув давомида Трамп, Зеленский ва вице-президент Жей Ди Вэнс журналистлар кўз ўнгида даҳанаки баҳсга киришди. Шундан сўнг учрашув тўхтатилди ва келишув имзоланмади. Трамп Зеленскийга «тинчликка тайёр бўлганида қайтиш»ни таклиф қилди.

Америка нашлари учрашувдан сўнг дарҳол бу баҳслашув АҚШ томонидан Украинага ёрдам кўрсатилишини шубҳа остига қўйгани ҳақида ёзишни бошлади.

The Washington Post нашри шахси сир қолишини истаган юқори мартабали мулозимга таяниб, Оқ уй ҳозирги ҳарбий таъминотни тўхтатиш имкониятини кўриб чиқаётганини ёзди. Агар тегишли қарор қабул қилинса, у умумий қиймати миллиардлаб доллар бўлган радарлар, транспорт воситалари, ўқ-дорилар ва ракеталарга тааллуқли бўлади.

Нашр суҳбатдоши таъкидлашича, бу вариант Зеленскийнинг Оқ уйдаги баёнотлари ва «тинчлик жараёнидаги муросасизлиги»га жавоб сифатида кўриб чиқилмоқда.

The News York Times манбалари хабар беришича, АҚШ Украинани қўллаб-қувватлашни, жумладан, разведка маълумотларини алмашиш, украиналик ҳарбийлар ва учувчиларни тайёрлаш каби билвосита ёрдамни бутунлай тўхтатиши мумкин. «Трамп ҳар қандай кейинги ёрдамни босим дастаги сифатида кўради», — деб ёзади нашр.

NYT суҳбатдошларидан бири таъкидлашича, яқин келажакда Жо Байден маъмурияти томонидан рухсат берилган ва тўланган ўқ-дорилар ва жиҳозларнинг сўнгги пакетлари ҳам бекор қилиниши мумкин.

Ўз навбатида, CBS News манбалари энди Оқ уйдагилар АҚШ ҳарбий ҳаракатларни тўхтатишда воситачи бўлиб қолишига шубҳа қилишаётганини айтди. Шу билан бирга, телеканал суҳбатдошлари таъкидлашича, Трамп «Украинадаги режимни ўзгартиришга интилмаяпти» ва Вашингтондагилар АҚШ учун Зеленскийдан кўра афзалроқ президент ким бўлиши мумкинлигини муҳокама қилишмаяпти.

Трамп Зеленскийни «жанг қилиш, жанг қилиш ва жанг қилиш»ни давом эттириш исташда айблади

Доналд Трамп 28 феврал куни кечқурун Оқ уйда журналистлар олдида нутқ сўзлаб, Украина президенти Володимир Зеленскийни сулҳ тузишни истамаганликда айблади.

«У яна жанг қилишни, жанг қилишни, жанг қилишни истайди. Биз эса ўлимни тўхтатмоқчимиз», — деди Трамп.

АҚШ президенти фикрича, у зудлик билан тинчлик ўрнатилишини истайди ва Россия президенти Владимир Путин ҳам «урушга чек қўймоқчи». «Зеленский Путин ҳақида ундай демаслиги, Путин ҳақида бундай салбий гапларни айтмаслиги керак», — деган у.

Трампнинг сўзларига кўра, АҚШ урушни тугатмоқчи ёки Украинани қўллаб-қувватлашни тўхтатиб, «нима бўлишини кўрмоқчи».