WSJ: Трамп инглиз тилини АҚШнинг расмий тили сифатида эълон қилмоқчи

Доналд Трамп инглиз тилини АҚШнинг расмий тили сифатида тан олишни белгиловчи фармонни имзолашни режалаштирмоқда. Бу ҳақда The Wall Street Journal газетаси АҚШ маъмуриятидаги манбаларига таяниб хабар берди.

«Фармоннинг тушунтириш хатида келтирилишича, инглиз тилини миллий тилга айлантиришдан мақсад бирдамликка кўмаклашиш, ҳукумат фаолияти самарадорлигини ошириш ва фуқаролар фаоллигини таъминлашдан иборат», — дейилади хабарда.

Нашрнинг ёзишича, фармон собиқ президент Билл Клинтон томонидан чиқарилган федерал мандатни бекор қилади. У агентликлар ва бошқа федерал молиялаштиришни оладиганларга инглиз тилини билмайдиган одамларга таржима борасида ёрдам кўрсатиш мажбуриятини юклайди.

Ҳужжатда қайд этилишича, шу билан бирга агентликлар инглиз тилидан ташқари бошқа тилларда ҳам ҳужжатлар ва хизматларни тақдим этишлари мумкин.

Доналд Трамп президентлик кампанияси даврида инглиз тилини билмайдиган мигрант талабалар синфхоналарда мулоқот қила олмаслигидан хавотирда эканини айтганди. Америка етакчиси бир неча бор инглиз тилини қўллаб-қувватлашини билдирган ва АҚШ аҳолиси айнан шу тилда гаплашиши кераклигини таъкидлаган.