Ўзбекистонда ҳомийлик маблағлари йиғишнинг аниқ тартиби белгиланмоқда

Қонунчилик палатаси йиғилишида ҳомийлик фаолиятини амалга ошириш тартибини такомиллаштиришга қаратилган қонун лойиҳаси биринчи ўқишда қабул қилинди. Лойиҳа Адлия вазирлиги томонидан ишлаб чиқилган.

Маълум қилинишича, қонун лойиҳасида нақд, нақдсиз ва мол-мулк шаклида ҳомийлик маблағлари йиғишнинг аниқ тартиби белгиланмоқда.

Хусусан, эндиликда жисмоний шахслар фақат ўзи ёки яқин қариндоши учун хайрия йиғиши мумкин бўлади. Кўнгиллилар ўзига бегона бўлган шахслар манфаати учун хайрия йиғишда фақат эълон бериш орқали кўмаклашади.

Хайрия қутиси фақат нодавлат ташкилотлар ва бошқа ҳомийлик қилувчи ёки олувчи юридик шахслар томонидан ўрнатилади. Нодавлат ташкилотлар ва бошқа ҳомийлик қилувчи ёки олувчи юридик шахслар нақд пул шаклида хайрияни фақат хайрия қутиси орқали йиғади. Хайрия қутиси шаффоф идиш бўлади, жойлаштириладиган манзил олдиндан эълон қилинади, уни очишда гувоҳлар қатнашади ва бу жараён видеотасвирга олиниб, жамоатчиликка эълон қилинади.

Хайрияларини йиғиш, хайрия қутиларини ўрнатиш тартибини бузганлик учун маъмурий жавобгарлик белгиланмоқда.

Хайрия орқали йиғилган пулларни ўзлаштириб юбориш ҳолатлари учраб туради. Масалан, ўтган йили Андижонда бировнинг бемор фарзанди суратини қўйиб эҳсон йиғган ва 25 млн сўм маблағни ўз эҳтиёжларига ишлатиб юборган аёл қўлга олинган. Шунингдек, Сирдарёда жоме масжид қурилиши учун йиғилган пулларни ўзлаштирган шахслар ушланганди.