Кун сўрови: бир ойда қанча картошка сотиб оласиз?

Kun.uz мухбири 12 феврал куни Фарғона шаҳридаги деҳқон бозорида кичик сўровнома ўтказди. Унда иштирок этганлардан 1 ой давомида неча кг картошка сотиб олишлари сўралди.

Сўровномада иштирок этган аксарият аҳоли картошканинг қимматлашиб кетиши ортидан ушбу маҳсулотни кам сотиб олаётганини айтган бўлса, яна кўпчилик Қирғизистондан кириб келадиган картошка ўрнига Покистон картошкаларини харид қилишга ўтганини билдирди.

Айни пайтда Фарғона шаҳридаги деҳқон бозорида қирғиз картошкасининг 1 килограмми 9-10 минг сўмдан, Покистон картошкаси эса 7-8 минг сўмдан сотиляпти.

Иқтисодиёт ва молия вазирлиги эълон қилиб борадиган маълумотларга кўра, 4 январдан 21 январгача бўлган муддатда Янги Қўйлиқ деҳқон бозорида картошканинг минимал улгуржи нархи 3500 сўмдан 6500 сўмгача ёки 85 фоизга, максимал нархи эса 6200 сўмдан 8500 сўмгача ёки 37 фоизга қимматлашган.

18 январдан бошлаб Қозоғистон қатор мамлакатлар, хусусан, Ўзбекистонга картошка экспортини 6 ойга тўхтатган эди. Бунга Қозоғистоннинг ўзида ушбу маҳсулот нархи ошиб кетгани сабаб сифатида келтирилган.

Ўзбекистон Қишлоқ хўжалиги вазирлигининг маълум қилишича, мамлакатда картошкага бўлган йиллик эҳтиёж 4 миллион тоннани ташкил этади. 2024 йилда 3,7 миллион тонна картошка етиштирилган бўлиб, шундан 600 минг тоннаси кейинги мавсумда экиш учун уруғлик сифатида захира қилинган, табиий йўқотиш тахминан 100 минг тонна (3%) бўлиши кўзда тутилган.