Исроил 600 дан ортиқ фаластинлик маҳбусларнинг озод этилишини бекор қилди

Бинямин Нетаняҳу ҲАМАСдан гаровга олинган исроилликлар «таҳқирловчи маросимларсиз» қўйиб юборилишини талаб қилиб, унгача фаластинлик маҳбусларни озод этишни тўхтатди.

Фото: Reuters

Исроил бош вазири Бинямин Нетаняҳу 23 феврал куни ҲАМАС гуруҳи гаровдаги исроилликлардан «таҳқирловчи маросимлар»да фойдаланаётгани учун 602 нафар фаластинликнинг озод этилиши тўхтатилганини эълон қилди, деб ёзади The Times of Israel.

«ҲАМАС томонидан келишувнинг бир неча бор бузилиши, жумладан, гаровдаги фуқароларимизнинг қадр-қимматини камситувчи маросимлар ва улардан пропаганда мақсадларида фойдаланилаётгани учун 22 феврал кунига режалаштирилган маҳбусларнинг озод этилиши кечиктирилди», — дейди Исроил бош вазири.

Нетаняҳу бу каби баёнот билан 600 нафардан ортиқ фаластинлик Офердаги қамоқхонани тарк этиш учун автобусларга ўтирганидан кейин чиқиш қилди. Кейинроқ уларга озод этилиш жараёни номаълум муддатга кечиктирилгани айтилган.

Фаластин миллий маъмурияти вакиллари маҳбуслар озод этилиши кечиктирилганини тасдиқлади. ҲАМАС Исроилни ўт очишни тўхтатиш битимини бузишда айблади.

ҲАМАС 22 феврал куни беш нафар исроилликни Ғазо секторидаги маросим давомида озод этди. Исроил фуқаролари ҳарбий бўлмаса-да, уларга армия формаси кийдирилганди. Шунингдек, шанба куни озод этилганлар қуролланган ҲАМАС аъзолари томонидан оломон олдида кузатиб борилган — бу картина БМТ ва Қизил Хоч томонидан шафқатсиз деб танқид қилинди.

ҲАМАС Исроил билан тинчлик келишувининг биринчи босқичи доирасида гаровга олинган 33 нафар исроилликнинг барчасини озод этди. Исроил ва ҲАМАС ўртасида ўт очишни тўхтатиш келишуви январ ойидан бери амал қилади. Келишувнинг биринчи босқичида Исроил 1900 нафардан ортиқ фаластинлик маҳбусларни қамоқхонадан озод қилиш мажбуриятини олган эди.

#Исроил #Бинямин Нетаняҳу #ҲАМАС