Apple ва Google TikTokʼни ўзларининг иловалар дўконига қайтарди

Хитойнинг TikTok ижтимоий тармоғи App Store ва Google Play иловалар дўконларида яна пайдо бўлди, деб ёзади Associated Press.

TikTok 19 январга ўтар кечаси АҚШдаги фаолиятини тўхтатганди, у App Store ва Google Play’даги иловалар дўконидан ҳам ўчириб ташланган. Шу билан бирга, Хитойнинг ByteDance компаниясига алоқадор CapCut видеотаҳрирчиси ва Marvel Snap ўйини ҳам йўқолиб қолган. Иловага киришга уринган америкаликлар «Кечирасиз, TikTokʼка ҳозирда кириб бўлмайди» ёзувига дуч келаётган эди.

АҚШнинг янги президенти Доналд Трамп инаугурациядан кейинги биринчи кундаёқ ушбу тақиқни кечиктиришга оид ҳужжатни имзолади.

Қўшма Штатлар ҳукумати 4 апрелга қадар TikTokʼка ўз тузилмасида платформанинг мамлакатда фаолият юритишини давом эттиришига имкон берувчи ўзгартиришларни амалга ошириш муҳлатини берди. Трамп АҚШ компаниянинг 50 фоизига эгалик қилиши кераклигини айтганди.

Америка ОАВ 13 феврал куни АҚШ бош прокурори Пэм Бондига йўллаган мактуб тўғрисида хабар берди — унда мамлакат Адлия вазирлиги TikTokʼка қарши тақиқни кучга киритмаслиги қайд этилган.

Эслатиб ўтамиз, Bloomberg Хитой ҳукумати TikTok ижтимоий тармоғининг АҚШдаги бошқарувини бизнесмен Илон Маскка бериш ниятида экани ҳақида ёзганди. Аммо TikTokʼнинг ўзи буни рад этган. Associated Press маълумотларига кўра, Байден администрацияси ижтимоий тармоқни блокировка қилиш қарорини Трампнинг бўлажак администрациясига қолдиради.