Оқ уй Трамп учун қўшимча стенографистлар ёллашни режалаштирмоқда

АҚШнинг амалдаги президенти жуда кўп нутқ сўзлагани боис стенографистлар унинг барча сўзларини қайд этиб боришга улгурмаяпти. Трамп Оқ уйга қайтганидан бери оммавий чиқишлари давомида 81 мингдан ортиқ сўз ишлатган.

Фото: AP

Оқ уй қўшимча стенографистларни ишга ёллашни режалаштирмоқда. Бу ҳақда Associated Press ўз манбаларига таяниб хабар берди. Таъкидланишича, Доналд Трамп президентлик лавозимига киришганидан кейин Оқ уйдаги мавжуд стенографистлар тушаётган юкламага бардош бера олмаяпти.

Маълумотларга кўра, Трамп оқ уйга қайтганидан бери умумий ҳисобда 7 соат 44 дақиқалик чиқиш қилган ва 81 минг 235 та сўз ишлатган. Жо Байден тўрт йил олдин президентлигининг илк ҳафтасида 24 минг 259 та сўз ишлатган.

Трамп 2017 йилда биринчи марта президент этиб сайланганида камера қаршисида 33 минг 571 та сўз гапирган эди.

«Доналд Трамп шунақа кўп гапирадики, унинг нутқини ёзиб олиши керак бўлган инсонлар барча сўзларни қайд этишга улгурмаяпти… Ҳозир иш юкламасини ҳал этиш учун қўшимча ходимларни ёллаш муҳокама қилинмоқда», — дейилади хабарда.

Агентликнинг қайд этилишича, Трамп ўзининг инаугурация нутқида 22 мингдан зиёд, табиий офатлардан жабр кўрган Шимолий Каролина ва Калифорнияга ташрифларида эса 17 мингта сўз ишлатган.

#АҚШ #Доналд Трамп