НҲҲ лойиҳаларининг жамоатчилик муҳокамаси бўйича топшириқ бажариляптими?

Икки ой олдин, қонуности ҳужжатлар лойиҳаларини жамоатчилик билан бамаслаҳат қабул қилишни кўзда тутувчи ҳужжат лойиҳасини бир ой ичида ишлаб чиқиш топшириғи берилган эди. Адлия вазирлигининг Kun.uz'га маълум қилишича, лойиҳа ишлаб чиқилган, лекин ҳали қабул қилинмаган.

2024 йил 20 ноябр куни Олий Мажлис Қонунчилик палатаси мажлисида қатнашган Ўзбекистон президенти Шавкат Мирзиёев ижро этувчи ҳокимият органлари қарорлар қабул қилишда қонунийликни, уларнинг асосланган бўлиши кераклигини айтган эди. Шунингдек, давлат раҳбари кейинги вақтларда қонуности норматив-ҳуқуқий ҳужжатлар лойиҳаларини жамоатчилик билан маслаҳат қилишда қонунларда белгиланган талабларга ҳамиша ҳам риоя этилмаётганига эътироз билдирганди.

Мажлисда президент Шавкат Мирзиёев томонидан Адлия вазирлигига бир ой муддатда бу масала бўйича таклифларни Қонунчилик палатасининг тегишли қўмитаси билан бирга муҳокама қилиш ва ҳукуматга киритиш топшириғи берилган эди.

Шунингдек, президент ҳукуматнинг қонунчилик ташаббуси билан Қонунчилик палатасига киритилаётган қонун лойиҳалари сифатини ошириш ҳам долзарб масала бўлиб турганини қайд этган эди.

Kun.uz ушбу топшириқ ижроси юзасидан Адлия вазирлигидан изоҳ сўради. Вазирлик матбуот хизмати ходими Анасхон Ҳамдамовнинг маълум қилишича, юқоридаги топшириқ бўйича “лойиҳа мавжуд, лекин ҳали ҳужжат чиқмаган”.

Лойиҳа ҳозир қайси босқичда экани, Вазирлар Маҳкамасига киритилгани ёки йўқлиги ҳақида маълумот берилмади. Шунингдек, лойиҳа Қонунчилик палатаси билан муҳокама қилингани борасида ҳам аниқ маълумот йўқ.

НҲҲ лойиҳаларининг жамоатчилик муҳокамалари бўйича ҳозирги қонунчиликда нима дейилган?

Аслида 2018 йилдаги қарор билан, барча норматив-ҳуқуқий ҳужжатлар лойиҳалари лойиҳани ишлаб чиқувчи ташкилотлар томонидан regulation.gov.uz порталида жамоатчилик муҳокамаси ўтказиш учун жойлаштирилиши лозимлиги белгиланган эди. Лекин фуқаролик жамиятининг муҳим тартибларидан бири 4 йилга қолмай анча заифлашган.

Хусусан, 2022 йил март ойидан ҳужжатга ўзгартириш киритилиб, ундаги “барча норматив-ҳуқуқий ҳужжатлар лойиҳалари” сўзлари “муҳим иқтисодий ва ижтимоий-сиёсий аҳамиятга эга норматив-ҳуқуқий ҳужжатлар лойиҳалари, қоида тариқасида” сўзлари билан алмаштирилган.

Ўшанда Адлия вазирлиги бу масала ижтимоий тармоқларда муҳокама қилиниб, жамоатчилик ўз эътирозларини билдира бошламагунича бу ҳақда ўз ресурсларида хабар ҳам бермаган эди.

НҲҲ муҳокамалари: Адлия вазирлигининг изоҳи қанчалик асосли?

#Адлия вазирлиги #НҲҲ #очиқлик