Ҳоким қарори: Тошкентдаги давлат идоралари ходимларига миллий либос кийиш тавсия этилади

Тошкент шаҳри ҳокими Шавкат Умурзоқов «Тошкент шаҳрида миллийликни кенг тарғиб қилишга доир қўшимча чора-тадбирлар тўғрисида»ги қарорни имзолади.

Қарорда қайд қилинишича, Тошкент шаҳрида миллийликни кенг тарғиб қилиш бўйича Тошкент шаҳар ишчи гуруҳи тузилади ва «Миллий Тошкент» лойиҳаси тасдиқланади.

Ишчи гуруҳи миллий либослар ва миллийликни оммалаштиришга оид тарғибот материалларини ишлаб чиқиш, оммавий тадбирлар даврида миллий либослар ва миллийликнинг мавқеини мустаҳкамланишини таъминлаш, миллий либослар ишлаб чиқарувчи тадбиркорлик субъектларини қўллаб-қувватлаш, мавзуга оид ўқув-семинарлари, танловлар ва бошқа тадбирларни ташкил этиш, қарорнинг бажарилиши юзасидан доимий назоратни амалга ошириш билан шуғулланади.

Қарордан келиб чиққан ҳолда, бошқарма ва ташкилотлар, туман ҳокимликлари тарғибот – миллий либослар ва миллийликнинг ижобий аҳамиятини кенг жамоатчиликка етказишга қаратилган маърифий, маданий, ахборот ва реклама тадбирларини амалга оширади. Миллий либосларда юришни, миллийликни тарғиб қилишни ва миллий маданиятни ривожлантиришни қўллаб-қувватлаш мақсадида моддий ва маънавий рағбатлантириш чораларини кўради.

Тошкент шаҳридаги давлат ташкилотлари, бошқарма ва муассасаларда миллийликни тарғиб қилиш йўналишида ҳафтанинг ҳар жума куни «Миллий либослар куни» деб белгиланади ва барча корхона, муассаса ва ташкилотларнинг жамоаларида тарғиб қилинади.

Тошкент шаҳар ва туман ҳокимликлари, ҳокимликлар қошидаги бошқарма, ташкилот ва бўлимлар, бошқа давлат органлари ва муассасалари ходимлари иш кунларида миллий либосларда юриши тавсия этилади (тасдиқланган хизмат кийимлари бундан мустасно). Ходимларнинг миллий либосларда юриши учун алоҳида шарт-шароитлар яратилади.

Миллийликни тарғиб қилиш мақсадида Тошкент шаҳар ҳокимлиги томонидан эълон қилинган «Миллий либосларимиз барчага ярашади» шиори остидаги «Миллий тренд челленджи» бўйича тарғибот ишлари олиб борилади.

Тошкентдаги ҳар бир маҳаллада миллий урф-одатлар ва анъаналарни сақлаш ҳамда тарғиб қилиш учун миллий ўйинлар, рақс ва қўшиқлар тўгараклари ташкил этилади.

Миллий қадриятлар ва миллий либослар мавзусида турли танловлар, викториналар, ўйинлар ҳамда бошқа тадбирлар ташкил этилиши ҳамда ушбу кўрик-танлов ва «челленж»лар ўтказилиб, унда фаол иштирок этганлар ҳокимлик томонидан муносиб рағбатлантирилиши режалаштирилган.

Шу билан бирга, қарорда «миллийлик» ва «миллий либос» тўғрисида батафсил тушунча берилмаган.