Макрон Франция ҳукуматини истеъфога чиқарди

4 декабр куни Франция Миллий мажлиси Мишел Барне бошчилигидаги вазирлар маҳкамасига ишончсизлик билдирган эди. 574 депутатдан 331 нафари бу қарор учун овоз берди.

Фото: AP

Франция президенти Эммануэл Макрон парламент томонидан билдирилган ишончсизлик вотумидан кейин бош вазир Мишел Барненинг ҳукумат истеъфоси ҳақидаги илтимосини қабул қилди. Барне янги бош вазир тайинлангунга қадар лавозимда қолади. Замонавий Франция тарихида илк бор бош вазир ўз лавозимида уч ойдан камроқ ишлади.

«Бугун бош вазир республика президентига ўз ҳукуматининг истеъфоси бўйича илтимоснома киритди ва у қабул қилинди. Мишел Барне ҳукумат аъзолари билан бирга янги ҳукумат тайинлангунга қадар жорий ишлар билан шуғулланиб туради», — дейилади Елисей саройи хабарида.

4 декабр, чоршанба куни Франция Миллий мажлиси Мишел Барне бошчилигидаги вазирлар маҳкамасига ишончсизлик билдирди. 574 депутатдан 331 нафари бу қарор учун овоз берди. Бундан уч кун олдин бош вазир конституциянинг 49.3 моддасидан фойдаланган ҳолда (бу парламентдаги овоз бериш жараёнларини четлаб ўтган ҳолда қонун қабул қилишга рухсат беради) 2025 йил учун ижтимоий суғурта бюджетини қабул қилган эди.

Мишел Барне Макроннинг иккита президентлик муддати давомида алмашган бешинчи бош вазир — ундан олдин Эдуард Филипп, Жан Кастекс, Элизабет Борн ва Габриэл Аттал ушбу лавозимда ишлади.

Мишел Барне ўнг марказчи Республикачилар партияси вакили. Сиёсий фаолияти давомида у Францияда ҳам, Европа Иттифоқи тузилмаларида ҳам турли раҳбарлик лавозимларида ишлаган. 2016 йилдан 2019 йилгача у Буюк Британиянинг ЕИдан чиқиши шартлари бўйича музокараларга раҳбарлик қилган.

Франция президенти Эммануэл Макрон сентябр ойида 73 ёшли консерватив сиёсатчини мамлакат бош вазири лавозимига тайинлаган эди. «Макрон унга мамлакат ва француз халқига хизмат қиладиган бирлаштирувчи ҳукумат тузишни топширди», — дейилган эди ўшанда Елисей саройи хабарида.

#Франция #парламент #ҳукумат