Британияда эркак газли ичимликларга қарамликдан қутулиш учун гипноздан фойдаланди

Буюк Британиянинг Марлоу шаҳрида яшовчи эркак Dr Pepper газли ичимлигига ойига 250 фунт стерлинг, ўн йил давомида эса тахминан 30 минг фунт стерлинг сарфлаган, деб ёзмоқда Daily Mail. Том Боуи ичимликка бўлган қарамликдан қутулиш учун ҳатто гипнозга мурожаат қилишга мажбур бўлди.

Унинг газли ичимликларга ишқибозлиги тушликда бир шиша ичишдан бошланган.

“Кейинчалик, ҳамкасбларим билан кун давомида уни сотиб оладиган бўлдик. Газли ичимликларни иш жойим ёнидаги қаҳвахонадан олиб келишарди, у ерда ичимликлар автомати ҳам бор, шунинг учун хоҳлаган пайтимда уларни сотиб олишим мумкин эди. Мен ҳатто фақат газли ичимлик ичавериб, сув ичишни тўхтатганимни ҳам сезмай қолдим”, — деб эслайди Том Боуи.

У газли ичимликларни қути-қути сотиб олар ва уларни захирага ғамлаб қўярди. Том Боуи семириб кетаётганини, қорни доим дам бўлиб, тишларида муаммо пайдо бўлганини пайқади. Эркак стоматологга мурожаат қилганда, шифокор беморнинг тиш эмалида емирилиш даражаси деярли 70 ёшли одамникидек эканини қайд этди.

Том Боуи фарзандларини ўйлаб, газли ичимликлардан воз кечишга қарор қилди, чунки унинг катта қизи ичимлик сўрашни бошлаганди. Зарарли одатини тарк этгач, у вазн йўқотди: ҳозир у газли ичимликларга қайрилиб ҳам қарамайди.

Аввалроқ Ҳарвард жамоат саломатлиги мактаби олимлари газланган ичимликларни истеъмол қилиш билан боғлиқ тадқиқот натижаларини эълон қилганди. Тадқиқот иштирокчиларининг 9252 нафари аёллар, 3519 нафари эркаклар эди. Тажрибанинг ҳар бир иштирокчисида иккинчи турдаги қандли диабет аниқланган: баъзиларда тадқиқот бошида, қолганларида тадқиқот давомида.

Улар ҳар икки йилда бир марта сунъий ширинлаштирилган ичимликлар, мева шарбати, қаҳва, чой ва сигир сутини қанчалик тез-тез истеъмол қилгани тўғрисида ҳисобот беришлари лозим эди.

Аниқланишича, газли ичимлик, мева шарбати ва лимонадни мунтазам равишда истеъмол қилганларда қандли диабет ва юрак-қон томир касалликларидан ўлим эҳтимоли анча юқори бўлган. Кунлик қўшимча порция истеъмол қилиш ўлим хавфини 8 фоизга оширган. Кунига бир порция газланган ичимлик ўрнига бир финжон қаҳва ичиш эса юрак-қон томир касалликларидан ўлим хавфини 20 фоизга камайтирган.

Шу билан бирга, қаҳва ҳам организмга зарар етказиши мумкин. Кофеин марказий нерв системасига таъсир кўрсатади, бу эса турли индивидуал реакцияларни келтириб чиқаради. У ошқозон деворларини зарарлаши, безовталик ва асабийликни кучайтириши, уйқу сифатига салбий таъсир кўрсатиши мумкин.